Nongpoh, K’lyngkot, 30: U Dr. D.D Lapang kum u kñi rangbah ka Kur Lapang bad uba la dei ruh u myntri rangbah barim ka jylla, haba kren mynta ka sngi ha ka jingïakynduh lang kaba 7, jong ka Seng Kur Lapang Pyllun 2025, kaba la long ha Madan Umdihar ha Ri Bhoi, u la ong ba dei, “ Dei tang ka jingsngewrit kaba lah ban tehsong ïa ka kur ka jaid”.
Haba kren ïa ka kyntien sngewrit, u Dr. D.D Lapang u la thmu ba kum ka Kur Lapang ka dei ban long ka nuksa ïa ka ri bad ka jaid byrniew ba ki dei ba long kiba sngewrit bad ha kawei ka bynta pat u la kyntu ba ka kyntien ‘bym lah’ kam dei ban rung ha ka jingmut jingpyrkhat ka kur.
Haba sneng ba kraw ïa ki longkmie, ki longkpa, bad ki khun samla ka Kur Lapang, u Dr. D.D Lapang u la kyntu jur ïa ka Kur Lapang hi baroh kawei, ba ki dei ban don ïa ka mynsiem jong ka jingïatylli ban tei na ka bynta ka bha ka miat jong ka kur bad ha kajuh ka por ruh u la kyntu ba dei ba don ka mynsiem jong ka jingtrei shitom ba ka kur kan lah ban pynmih shibun ki riew khraw hapoh ka ri bad ka jaid bynriew na ka Kur Lapang.
Ha kane ka sngi, la ai jingkren ruh da ka Kong Nosbalin Lapang kum ka longkmie rangbah bad u Bah J.W Lapang kum u kñi rangbah, kiba la pynmih kawei ka sur, ba donkam ka jingïatylli hapoh ka kur bad ruh ban don ka mynsiem kaba ïatrei lang ha baroh ki liang na ka bynta ban tei ïa ka kur Lapang ba kan long kawei ka kur kaba ai nuksa ba bha tam sha ka ri bad ka jaid bynriew.
Ha kane ka sngi, nalor ka sneng ka kraw na ki heh ka kur Lapang, la pynphuh pynphieng ruh da ka jingshim bynta ki kur Lapang na kylleng ka Ri Khasi Jaiñtia, ryngkat ki jingrwai bad ka jingpynskhem ïa ki nongïalam ba thymmai ka Seng Kur Lapang Pyllun ba kynthup ïa u President ba la jied ïa u Bah Tynshaiñ Lapang, Vice president Kendrowell Lapang, Baïateilang Lapang, Chief adviser Dr. D.D Lapang, Adviser J.W Lapang, General Secretary Albertus Lapang lem bad kiwei kiwei ki nongïalam bad ki dkhot ka seng kur Lapang.
