Dei tang ka jingkren u riewshimet ym dei na ki MLA ne party : ong u Conrad ba kynthoh ka BJP

By Mawphor Editor On Sep 8, 2022

Shillong, Nailur 07 : U Myntri Rangbah ka jylla Conrad K Sangma ha ka sngi Balang u la ong ba ki nongïalam ka BJP na Delhi khlem pep kin pyntip beit ïa u lada don kano kano kaba ki kwah ban ong.
Kane ka jingkren jong u kadei halor ka jingkynthoh jong u National Vice President ba dei peit ïa ka Meghalaya, u Dr. Chuba Ao ba ka party BJP kan sa weng noh na ka sorkar MDA hapoh shibnai.
Katkum ka jingong jong u Conrad, katei ka jingkren jong u Dr. Chuba Ao ka dei ka jingkren shimet bad kam dei satia ka jingkren kum ka party. “Nga ngeit skhem ba lada ki don ban ong ei ei ki nongïalam ka BJP na Delhi kin pyntip bad ïa syllok bad ngi,” u la ong haba kren bad ki lad pathai khubor.
“Kumba nga ong (lada ki don ei ei ban ong), kadei ban don ka jingïatylli hapoh ka party bad kin hap ban don lang ruhki MLA bad kiwei ki nongïalam jong ka party ban pynsngew lang kawei ka sur hynrei kaei kaba ngi ïohi ka long ba tang uwei u riewshimet u pynmih ïa kane bad ym don satia ban kyrshan ïa u bad bun ki nongïalam bad ki MLA ki ong da kumwei pat,” ong u Conrad.
Halor ka jingkam jong u Dr. Ao ba ki Enforcement Directorate (ED) bad ka Central Bureau of Investigation (CBI) kin wan ban khynra ïa ka sorkar MDA halor ka jingsuba bamsap, u Myntri Rangbah u la ong, “Ki la ïatreilang baroh shi katta kumta lada uwei u kynnoh ïaka MDA ba donkti ha kine ki kma baroh, nga ngeit ba ki klet ba ki kdew lai tylli ki shympriah ïalade ha ka por ba ki kdew ïa kiwei.”
U ong ba kawei kaba ki skhem ka nongrim ka long ba kaei kaba ki leh ka long katkum ki kyndon jong ka aiñ bad ruh da ka lynti kaba khuid bad kaba shai.
Shuh shuh u Conrad u ong ruh ba ka jingkren jong u Dr.Ao ka pyni ba u don ka jingïathut bad ka kam shimet badno badno. “Ngi ju ïai ïohi ïa ki jingkren jong u kaba wat ki nongïalam party lane ki MLA ruh kim mynjur satia bad u,” bynrap biang u Conrad. La katta ruh u ong ba ka NPP ka la pyrshang ban pynbeit ïa baroh ki jingïapher jingmut kiba mih bad baroh ki kynhun synrop ba thaw ïa ka MDA kynthup ïa ka BJP.
U ong ruh ba ha ka jingtreilang ha kine ki sawsnem shiteng ki la don shibun ki jingat phyllung hynrei ki la ïatylli lang kawei ban ïakhun ïa kitei baroh.