Dei tang ka jingïakren ym da ka thma kaba lah ban ban weng ïa ka jingïakajia pud: Conrad

Shillong, Nailur, 14: U Myntri Rangbah ka Jylla u Conrad K Sangma ha ka sngi Palei u la ong ba ka jingïakajia pud kaba la sah pongding da ki phew snem hapdeng ka Jylla Meghalaya bad ka Jylla Assam yn sa lah ban pynkut tang da ka jingïakren bad ka jingïathir ïatai hynrei ym da ka thma.
Kane ka jingkren jong u Myntri Rangbah ka long hadien ba ka Khasi Students’ Union (KSU) Laban Circle ka la byrngem ban khang khyrdep ïa ka Karbi Hemtun (Guest House) lada ki jaidbynriew Karbi bad ka Sorkar Assam ki dang ïai bteng ban kyntur pud be-aiñ bad ban pyndik ïa ki paid Khasi-Pnar kiba sah ha West Jaiñtia Hills District.
Ïa ka Karbi Hemtun la plie paidbah lang da u Myntri Rangbah ka jylla Assam u Himanta Biswa Sarma bad u Myntri Rangbah ka Meghalaya u Conrad Kongkal Sangma ha ka sngi Balang.
Ha ka jingïakren bad ki lad pathai khubor, u Sangma u la ong ba ka thma kan ym pynmih soh eiei ruh em.
“Ngi don ha India bad haoid, ngi hap ban trei bad ban ïasyllok halor kane ka kam bad ban im hapdeng ka shongsuk shongsaiñ. Kine ki dei ki jingtynjuh, ki dei ki jyrwit jyrwat kiba ngi hap ban bishar hynrei yn ym lah ban weng ïa kine ki jingeh da ka lynti jong ka thma. Ban weng ïa ki jingeh dei tang lyngba ki jingïasyllok bad ki jingïakren, da ka jingïasngewthuh jingmut bad ka jingshahniah bad namarkta ngi donkam ban pynthikna ba ngi dei ban tei ïa ka jingshahniah bad ki paralok ba marjan jong ngi, ban sngewskhem ha ki jingïakren bad ha ki kyndon ïakren, ban wad ïa ki lad ki lynti kiba ngi lah ban ïa sngewthuh lang iwei ïa iwei pat bad ha kum kine ki khep ba kham kongsan, kine ki jingshahniah ki dei ban don,” u la ong.
“Namarakata, lashai lada phi kwah ban buh ïa ka Meghalaya House ha Assam ne ha Guwahati bad lada don mano mano ba ong phim lah ban leh kumta, ngam tharai ba kata kan dei ka lynti kaba bha,” u la bynrap.
“Haoid, ngam ong ba kam don ka jingsngewkhia, ki don ki jingsngewkhia hynrei ban weng ïa kine ki jingeh, ka thma kam dei ka lynti. Ngi donkam ban ïatreilang ban tei ïa ka jingshahniah bad ka jingïasngewthuh jingmut na ka bynta ban pyntyllun shakhmat bad kata ka dei ka khubor kaba mih hynnin ka sngi (ha ka jingplie paidbah ïa ka Karbi Hemtun),” la ong u Sangma.
Ha kajuh ka por, u Sangma u la pyntip ba u Myntri Rangbah ka Jylla Assam bad Meghalaya kin sa buh tarik ban pynthikna ha kaba ïadei bad ka jingïakren pynbeit pud ha ka wat kaba ar, ha ki khyndiat sngi ki ban sa wan.