Dei tang ha ka miej yn lah ban ïakren ïa pynbeit ïa ki jingeh

Shillong, ïaïong, 30: “Ki jingïakhih ne ki jingïakyang sha surok kin ym lah ban weng ïa ki jingeh hynrei dei tang lyngba ki jingïatai ha ka miej jingïakren kiba lah ban weng ïa ki jingeh,” ong u Lamphang jong ka Ingdorbar Thawaiñ ka Jylla u Bah Metbah Lyngdoh haba kren kum u Kongsan ha ka jingïalang kaba shisien ar snem jong ka All Members Primary School Teachers’ Association (AMPSTA) kaba la long ha nongbah Shillong ha ka sngi Saitjaiñ.
Kane ka jingkren jong u Lamphang ka long halor ki jingïakhih ïaksaid ba la pynlong da ki nonghikai skul ha ki kyrdan bapher bapher ban dawa ïa la ka jong ka hok na ka Sorkar Jylla.
“Nga kren kum u Nongthawaiñ ba la jied da u paidbah ba ngi kwah ban pynjanai ha ka rukom siew tulop ïa ki nonghikai ba kan pynlong ïa ka Jylla Meghalaya ka lawei kaba phyrnai,” ula ong.
Katkum ka jingïathuh jong u General Secretary ka ka AMPSTA u Bah FC Shullai, ki nonghikai Deficit ki don palat 32 hajar tam naduh ka kyrdan Lower Primary haduh Higher Secondary.
“Ka Sorkar ka hap ban pynlut pisa palat T.1717 klur tang ha kaba siew tulop ïa ki nonghikai,” u la ong.
U la buh jingkylli ruh ba balei ki nonghikai skul ki don ha ki kyrdan bapher bapher, katba ka jingsiew tulop ka long kaba ïapher haduh katta katta.
Ha Meghalaya, ki kyrdan jong ki skul ki long, ki skul Sorkar, ki skul Deficit, ki skul Adhoc, ki skul SSA, ki Non-Government School, ki skul kiba shu ïoh jingïarap na ka Sorkar bad kiwei kiwei. “Balei ki bun kyrdan haduh katne katne nalor ba ka jingsiew ka ïapher kawei na kawei pat,” u la ong.
U la buh jingkylli ruh ba balei ka Sorkar kam pat lah ban thung ïa u Sub-Divisional School Eduction Officer (SDSEO) uba pura.
“Ka long kaei kaba eh ban pyntyllun ïa ki kam lymda ka Sorkar ka thung ïa u SDSEO uba pura,” u la bynrap.
Haba pyntip ba i Kmie jong u ruh i la long mynshwa kum ka nonghikai, u la ong, “kum ki nonghikai ki don ïa kata ka mynsiem aiti lut ban kyntiew ïa ki khynnah bad kim kwah ba ki khynnah kin duh mynsiem bad ki sah klas.”
U la ong ba ka Sorkar Jylla ka la ïatai na ka por sha ka por na ka bynta ka jingeh ki nonghikai kyllum lang baroh khlem da pynïapher kyrdan.
Hane ka jingïalang, la sakhi lang da u Bah JA Marweiñ, Incharge Sub Divisional School Education Officer, Shillong kum u Symbud Kongsan, ki nongkitkam ka Association ba kynthup ïa u Mritunjoy Ch Marak kum u President, u Bah FC Shullai kum u General Secretary bad ki nonghikai.