Dei na ki kam ba kane ka seng NPP ka trei kaba khring ïa nga: Kong Naphishisha Marweiñ

Shillong, Rymphang 28 : Ka National People’s Party (NPP) ha ka sngi Palei ka la pdiang burom ïa ka Kong Naphishisha Marwein kaba dei ka kyrtong kaba aireng ha elekshon MDC kaba dang shu dep ha Umroi constituency na ka tiket United Democratic Party (UDP).
Ïa kane ka longkmie la pdiang burom da u President jong ka National People’s Youth Front ba dei ruh u Myntri ka tnad ka Koit ka Khiah ka jylla Bah Wailadmiki Shylla, nangta u Working President ka party Bah Hamletson Dohling, MLA ka Umroi Bah Damanbait Lamare, Nongaiktien ka Party Bah HM Shangpliang, General Secretary ka party Prof Don War, General Secretary ka NPYF Bah Phermanbha War, Bah Bajop Pyngrope bad bun bha ki Rangbah, ki Longkmie bad ki paidbah nongkyrshan
U Kongsan ha ka jingkren u la ong ba kum ka party ki sngewthuh ba kam dei satia ka kam kaba suk ban ia kren ban wanrah ia ka jingkylla.”Ha ka synshar khadar kham ñiar ban long nongialam hadien ba ki la rem hynrei bun ki long nongialam tang ha ka por ba ki don ha ka bor. Hynrei nga ïohi pat ia i Kong Naphi ba i iai bteng ban trei wat haduh mynta,” u la ong.
U Bah Wailad u ong ba dei kane kaba pynlong ia ka party ban iakren bad khring ia ka ban don bad treilang ha ka party na ka bynta ban pynkhlain shuh shuh ia ka jingtreikam jong ka party.
U la iathuh ruh ba kane ka sorkar jylla ka buh hakhmat eh ïa ki khun samla bad dei na kane ka daw ka la wanrah ïa ka mang tyngka kaba haduh 8000 klur tyngka. U la pyntip ruh ba mynta lei lei ki samla ba wanrah takma ha ki lympung kiba heh ka kam sorkar ka la ap lypa ïa ki.
Haba kren ha ka jingialang ka Kong Naphi ka la ong ba dei na ka jingtrei bha jong kane ka party kaba khring ïa ka ban shoh jingieid ïa ka NPP.Ha kajuh ka por ka ong ruh ba kawei pat kaba khring ïa ka dei namar ka ïohi ba ka NPP ka pynleit jingmut ban kyntiew ïa ki khun samla.
“Nga shim ka rai kaba skhem ba ngan long ka nongtrei kam kaba pura bad ngan trei met bad mynsiem ban pynbha ïa ka imlang sahlang,” ka la ong.
Na ka liang u MLA ka Umroi Bah Damanbait Lamare pat u la ong ba ka jingwan pynïasoh jong ka Kong Naphishisha kan kyntiew bha ïa ka party ha Umroi bad ha ka jylla baroh kawei.
U ong ruh ba ha ka elekshon MDC ba la dep ki ïa khun pyrshah bad baroh ar liang ki khlem poi sha ka thong hynrei nangne shakhmat pat ki ïoh ban donlang ban trei lang nangne sha khmat.
U Bah Hamletson ha ka jingkren u la ong ba ki sngewkmen haduh katta katta halor ka jingwan pynïasoh jong ka kong Naphi. “Ngi sngew donbok haduh katta katta ban pdiang ïaphi ha ka party kham tam haba ngi ïohi ïa ka jingshemphang jong phi ha ka sainpyrthei,” u la ong.
U Bah Hamlet u ong ruh ba watla ka NPP ka ioh ban ïalam ia ka bor synshar hynrei kam ju khein sting ne shim kabu tang ha ka por elekshon kumta ki trei beit man ka sngi bad dei na kane ka daw bun ki nongialam ba shemphang bad kiba kitkhlieh ia ka Jaidbynriew.