Shillong, Risaw 22 : U Chief Executive Member (CEM) ka KHADC, Bah Winston Tony Lyngdoh ha ka sngi Balang u la pynshai ha Ïïng Dorbar ba ka jingai ïa ka notis na ka bynta ban siew ïa ka professional tax la leh khlem ka jingtip jong ka Executive Committee.
U la ong ruh ba ka EC ka la dep shim ruh ïa ka rai ba kan ai da ka showcause notice lada ki lap ba ki nongtrei lane ki ophisar ki donkti ha ka jingai ïa ki notis khlem ka jingtip jong ki. U la kam ruh ba ka EC ka khlem jer kyrteng ïa kino kino ki ophisar ha ka kyrwoh sha ki lad pathai khubor hynrei ïa ka kyrteng jong ka ophisar ba paw kyrteng la lait-tuh ha ki rynsan social media.
Haba pynshai halor ka jingkynnoh ba ka EC ka pynlong langknia ïa katei ka ophisar, u CEM u ong ba ka dei ka kamra jong ki kum ka EC bad MDC ban kyrshan ïa ki ophisr bad ruh ba kim don kano kano ka jingthmu ban pynlong langknia ïano ïano.
Shuh shuh u la kdew ruh ba ka ka rules 27-28 jong ka AD Rules, 1951, ka ai bor ïa u ban pan jingpynshai. U CEM u kyntu ruh ïa ki MDC ba ki dei ban ailad ia ka EC ba kan bishar ïa ka jubab jong ka Ophisar bad kyular ruh ba kin shim ruh ïa ka rai lada donkam.
Ha shwa kane, u Executive Member (EM) ba peit ïa ka tnad Taxation, Bah Seibor Warbah u la kam ba ka rai jong u CEM ban pan jingpynshai na ka ophisar ka long beit tang ban pynbeit ïa ka rukom treikam bad ban khanglad ïa ka jingartatien ha ka jingmut jingpyrkhat jong ki paidbah.
U EM u la ong ruh ba ka thong jongka EC ka long ban pynkhlaiñ ïa ka rukom treikam kaba la tlot bad ba kam dei satia ban buh pat ïa ki ophisar ha ka jingeh.
“Ngim don jingthmu satia ban buh jingeh ïa ki ophisar, ngi ju khot ïa ki ban ïatai na ka por sha ka por,” u la ong. U EM u la pynshai ruh ba wat hadien ba la pynsangeh noh ïa ka jingsam ïa ki notis sha ki nongdie dukan kiba rit hynrei ka jingsam ïa ki notis ka dang ïai bteng kaba pynlong ïa ka EC ban tuklar.
U ong ruh ba ka jingai ïa ka showcause notice ka long ban pynbeit pynryntih ïa ka rukom treikam.
