Dei ki Sahep ka tnad Tourism kiba thok bad kim pat bit ban shong shuki, ther ka GTF

Nongpoh, Ïaiong 01: Ka Greentech Foundation kawei naki kynhun ïada mariang, kala ther tyngeh ïaka sorkar jylla bad ka tnad Tourism ha kaba ïadei bad ka jingthmu ban tei ïaka 5-star Luxury Resort & Spa ha pung Umiam, hadien ba ka sorkar jylla lyngba ka ophis jong u Commissioner Secretary ka tnad Tourism kala pynmih ïaka kyrwoh ba ka don ka jingïalam bakla ha kaba ïadei bad ka jingshna ïa katei ka resort ha pung Umiam.
Haba kren sha ki lad pathai khubor naka liang u Bah H Bansiewdor Nonglang Chairman ka Greentech Foundation u la pynpaw ka jingsngewlyngoh halor ka kyrwoh bala pynlait da ka ophis jong u Commissioner Secretary ka tnad Tourism bad buh ïaka jingkylli mano kita ba ïalam bakla bad ban pynsngewthuh bakla sha ki paidbah ha kaba ïadei bad ka jingtei ïa katei ka resort, hynrei dei ka sorkar lyngba ka ophis jong u Commissioner Secretary ka tnad Tourism kiba pynsngewthuh bakla bad ïalam bakla ïaki paidbah.
U la ong ruh ka jingshisha ka paw ba wat u myntri ba dei peit ïaka tnad Tourism um don jingtip eiei ba ka Lumpongdeng Island ka dei shibynta jong ka 66 akar ka jaka bala aiti sha ka IHCL (Tata Group) naka bynta 60 snem naka bynta ban tei ïa katei ka resort.
Utei u nongïalam u la ther tyngeh ruh ïaka sorkar ba kumno ym don jingtei ha katei ka dewlynnong katba haka RTI bala pan da ka kynhun da ka MSPCB la ai ruh ïaka Consent to Establish sha ka Umiam Hotels Private Limited ha kaba kan don ka jingtei ïaki luxury villas, café, restaurants bad kiwei kiwei ha kaba u la buh ruh ka jingkylli hato ka tnad Tourism kan tei ïakatei ka resort ha suiñ?
Shuh shuh ka tnad Tourism haduh mynta kam nud ban jubab bad ban ai ïaka RTI wat hadien ba kum ka kynhun kala dep ban pan jingshai ha kaba ïadei bad katei ka project, bad kane ka paw shai ba dei ki ophisar ka tnad Tourism kiba ïalam bakla bad ki thok ïaki paidbah ban myntoi shimet
Namarkata naka liang ka Greentech Foundation ka pynrem jur ïa ka kyrwoh bala pynmih da ka tnad Tourism ba ka dei kaba thok bad kaba ïalam bakla ïaki paidbah bad ki ophisar kiba shong haka shuki kim pat bit ban treikam bad dawa ruh ba kidei ban hiar shuki mardor ryngkat ka kyrwoh kaba shai sha ka sorkar ba em te em wat ktah ne wat pynjot ïa ka mariang bad katei ka dewlynnong ha pung Umiam.