Shillong, Jylliew, 14: U Chairman jong ka Regional Committee na ka jylla Assam u Piyush Hazarika u la kynnoh ba dei ki runar kiba ju thaw jingkulmar ha khappud jong ka thaiñ Block-I, kaba don ha khappud jong ka West Jaiñtia Hills bad West Karbi Anglong.
Ïa kane, u Hazarika u la pynpaw ha ka jingïakren bad ki lad pathai khubor hadien ba la wai ka jingïalang banyngkong eh jong ka Regional Committee kaba la long ha nongbah Shillong ha ka sngi balang.
Haba kylli, hato kine ki runar ki dei neem na ka jylla Assam, u Hazarika, u la ong, “ki runar kin dei beit ki runar, ngim lah ban ong la ki dei na Assam ne na Meghalaya bad ngi lah ban ong ba kim dei satia ki briew jong ngi bad kumno phin ithuh ïa kita ki runar da kaba shu shong nangne hynrei ki paidbah ka jylla Assam ki dei kiba don ka jingïaieid bad ka jingïadei kaba jan bad ki paidbah ka Meghalaya bad nga ngeit ba ki paidbah ka Meghalaya ruh ki don ka jingieid ïa ki paidbah ka jylla Assam”.
Halor ka jingjia ha ka shnong Khanduli, u Hazarika u la pynpaw ïa ka jingsngewkhia bad ong, “ngim dei ban don ka jingïakajia hynrei ngi dei ban don ka jingïadei kaba jan bad ki paidbah ka Meghalaya. Ki paidbah na ka Jylla Meghalaya bad ka Assam ki im hapdeng ka shongsuk shongsaiñ bad ka sorkar jong ngi bad ki Myntri Rangbah ruh ki angnud hi tang ïa kata.”
Dang shen, ka la mih ka jingïakynad kaba jur hapdeng ki Karbi bad ki Pnar ha ka shnong Khanduli, West Jaiñtia Hills District kat haduh ba ka la jia ka jingïapynibor kaba mar kylliang.
“Ngim don kano kano ka daw bad ki paidbah ka Meghalaya. Ngi don ka jingïadei kaba jan bad ka Meghalaya bad ngi burom ruh ïa ki paidbah ka Meghalaya bad ïa ki paidbah jong kiwei kiwei ki jylla ha ki jylla jong ka thaiñ Shatei Lammihngi,” ong u Hazarika.
