Dei ki paidbah ki ban rai ïa ka tiket bad u kyrtong na Umsning Constituency: Metbah Lyngdoh

Nongpoh, Nailar 27: Ki nongkitkam ba hakhmat jong ka Umsning Constituency People’s Forum ryngkat bad ki hajar ngut ki nongkyrshan, mynta ka sngi kila leit ban pynïasoh noh bad ka party UDP ha shuwa ka elekshon 2023 khamtam ban pynkhlaiñ ïaka party bad ai ka jingkyrshan ba pura ïa u kyrtong ba pynïeng da ka UCPF baroh shikatta u Bah Sunshine Makri watla ka party UDP haduh mynta kam pat pynbna tiket na Umsning.
Kum ban shu pynpaw ba ka Umsning Constituency Peoples Forum kala pynïeng da u Bah Sunshine Makri naka bynta ka elekshon sha ka iing dorbar thawaiñ, hynrei baroh ki nongkitkam bad ki nongïalam katei ka kynhun naduh u Bah Sunshine Makri kum u President ka kynhun bad ki nongkitkam ryngkat ki nongkyrshan kila mih noh mynta ka sngi ban pynïasoh bad ka UDP da ka jingkyrmen skhem ba ka party UDP kan ai tiket ïa u Bah Sunshine Makri.
Ïakitei ki nongkitkam jong ka UCPF baroh la pdiang burom da u Bah Metbah Lyngdoh President ba rangbah ka UDP haka jylla haka jingdonlang u Dr. Jemino Mawthoh General Secretary, Bah Donbok Khymdeit President ka UDP Ri-Bhoi, Bah Pius Marweiñ MLA Ranikor, Balajied Kupar Synrem MLA ka Shella, ki nongkitkam jong ka party UDP naka jylla, ka district naduh ki longkmie.
Haba kren ha katei ka sngi naka liang u Bah Sunshine Makri u ba la rai ruh ban ïakhun ha kane ka elekshon ban wan ha u snem 2023, u la pynpaw ba ka jingleit rung sha ka UDP ka dei ka jingkwah jong ki paidbah kiba la poi lang ruh ha katei ka sngi da ki hajar ngut ban ai ka jingkyrshan ba pura ïaka party UDP kaba don ruh ka jingkyrmen ban lamkhmat ïaka sorkar ha kane ka elekshon ban wan.
U la ong ruh ba u don ka jingangnud kaba khraw ban ai ka jingshakri kaba bha tam sha ki paidbah ka Umsning Constituency da ka jingkyrmen ruh ban ioh ticket naka party UDP kumba ki kwah bad angnud.
Naka liang u Bah Metbah Lyngdoh haba kren ha katei ka sngi u la pynpaw ka jingsngewkmen ban iohi ba ki hajar ngut ki paidbah kila tuid ha katei ka sngi naka bynta ban sakhi bad ban ai ka jingkyrshan ïaki nongïalam ka UCPF kiba la wan ban pynïasoh ïalade bad ka party UDP ban nang pynkhlaiñ shuh shuh ïaka party naka bynta ka elekshon 2023 kumba ka party UDP kala dep ban mad ruh ki nam rem ha ki snem bala leit noh.
U la ong ruh kumba long haduh mynta ïaka tiket ha UDP ym pat pynbna ha Umsning Constituency, bad ïaka tiket dei ki paidbah kiban shim ïaka rai bad ban sei ïa u kyrtong, da kaba kular ruh ba ka party UDP kan nym pynduh mynsiem ïaka jingangnud bad ka jingkwah jong ki paidbah ha Umsning namar ïaka tiket dei ki paidbah ban sa shim pat ïaka rai da ka State Election Committee jong ka party.