Shillong, Naitung 03 : Ka National People’s Youth Front (NPYF) ha ka sngi Nyngkong ka la ong ba dei ki MP jong ka National People’s Party (NPP) kiba kren nyngkong hapoh Parliament ban dawa ai jingithuh ïa ka Ktien Khasi bad Garo ha ka Khyrnit kaba Phra jong ka Riti Synshar jong ka Ri.
“Ki MP jongngi i Agatha Sangma bad ruh i Dr. W.R Kharlukhi ki la dep ban kren ïa kane ka mat hapoh Parliament. Na ka liang ka NPYF ngi kwah ba kan urlong bad ïoh jingithuh noh ym ban kut noh tang ha ka jingïakren ha Parliament,” ong u Nongai Ktien jong ki, Bah Bajop Pyngrope haba kren bad ki lad pathai khubor ha kane ka sngi Balang.
Utei u nongïalam ka NPYF u la ong ruh ba dang ha kine ki khyndiat sngi ki la ïohi ruh ba u MP jong ka TMC u kren ïa katei kajuh ka phang. “Ngi ai khublei ïa baroh kiba la don bynta lang ha kane ka jingïakhun namar kane ka mat ban ïoh jingithuh ïa ka Ktien Khasi bad Garo kadei ka mat kaba hap ban buh shwa ïa ka politik sharud namar kadei kaba ktah ïa ki nongshong shnong Khasi Jaintia bad Garo ha ka jylla hi baroh kawei.”
Na ka liang ka NPYF ka kyntu ruh ïa ki sengsain pyrthei bapher bapher ba kin kyrshan lang ïa katei ka jingïakhun.
“Ngi la ïohi ruh ba wat ki MP ki bym nang kren Khasi ki la rah ïa kane ka mat hapoh Parliament ,” u la ong da kaba bynrap ba mynta lei ba la jan ka elekshon baroh hi kin shim kabu ïa kane.
Ha kajuh ka por, u la ai ruh ka burom ïa ka Khasi Authors Society kaba la lamkhmat ïa kane ka jingdawa.
