Shillong, Rymphang 18: U nongïalam ka United Democratic Party (UDP) bad Myntri Sorkar Bah Paul Lyngdoh ula ong ba ka Executive Committee ba 3 snem shiteng ba la ïalam da ka UDP ha KHADC, ka la pynbeit ïa ki kam ba ïadei bad ka jingkyntur pud ka Meghalaya Urban Development Authority (MUDA).
Ïa kane u Bah Paul ula kren ha ka rynsan ïalap elekshon ha Jaïaw ban pan jingkyrshan ïa u Bah Auguster Jyrwa kyrtong ka UDP ban ïakhun ia ka elekshon MDC na Jaïaw Constituency, ka ban long ha ka 21 tarik mynta u bnai.
Katkum ka jing ong jong u, ki don katto katne ki nongïalam seng saiñ pyrthei kiba la mih ban ïakhih pyrshah ïa ka jingkyntur pud ka MUDA hynrei ka khlem poi shano shano ruh watla ki la ïatakhuh bad pynibor marmet bad ki Pulit hajan ka State Central Liberary ha utei u snem.
“Hynrei, ngi kum ka party ngi kren duna bad trei kham bun ka kam. Ka khyllipmat ba ngi shimti ïa ka EC ha KHADC, ngi la lah ban pynbeit ïa kane ka kam ban pynthikna ba ka District Council kan ïohbor kum ka bor khmih haba ïadei bad ka jingai jingbit ban tei ïing ha ki jaka sixth schedule. Ngi la ïashong jingïalang haduh lai sien bad u Symbud Myntri Rangbah Bah Sniawbhalang Dhar bad ngi la rai ba ka MUDA Bye laws kan ym treikam shabar ka jaka Municipal,” ula ong haba pyntip ba ka KHADC ka la ïoh lum haduh T.55 lak kum ka khajna na ka bai ai jingbit ban tei ïing ha u snem 2022-23, T.1.64 klur ha u 2023-24 bad T.3.20 klur ha u 2024 haduh mynta.
“Nalor kane, ngi la pynïap noh ïa palat 400 tylli ki Trading Licence jong ki bar Jylla. Kane ka pyni ba ngi ailad ïa ki kam jong ngi ba kin kren kham jam ban ïa ka ktien” ula ong.
Ula ong ruh ba kiwei pat ki soh jingtreikam jong ka EC ba ïalam da ka UDP ki kynthup ïa ka jingai syrnot ïa palat 400 ngut ki briew kiba aplai ïa ka ram shna ïing na ki Bank bapher bapher bad ka jingmynjur ïa ka Land Act bad ka Clan Act.
“Hynrei sngewsih, ki don ki seng saiñ pyrthei (VPP), kiba kam ba ki ïeng ban ïada ïa ka riti ka dustur ba riewspah jong ka Jaidbynriew hynrei u President jong ki u Bah Ardent Basaiawmoit ula ïengskhem ba ki Khun jong u, ki la shim ïa ka jait jong u ka jaitkpa bad kane hi ka dei ka jingpyrshang ban pyntroiñ ïa ka dustur ai jait kmie bad Lineage Act,” ula ong.
Haba kyntu ïa ki paidbah ka Jaïaw Constituency ban vote ïa u kyrtong ka UDP Bah Auguster Jyrwa, u Bah Paul ula ong ba u sngewskhem ba ka UDP kan ïalam ïa ka Executive Committee ba thymmai ha KHADC.
