Dei ka sorkar India ba siew ïa ka ram ong u CM ba mih shi mih ka jingkynnoh shim ram

Shillong, Nailur 14 : U Myntri Rangbah ka Jylla, Conrad K Sangma u la ong ba ki ju mih beit ki jingkren man ka por ba ka sorkar ka shim ram shi shim ram, kumta dang shen haba jubab halor kawei na ki mat ïatai ha Iing Dorbar u la pynshai lut halor kane ka phang.
Ïa kane u Myntri Rangbah u la jubab hadien ba ka jingïatai ka la poi sha ki projek kam pynroi kiba wan na shabar lane kita ki externally aided projects (EAPs).
Haba pynshai halor kane, u la ong ba ka jingïoh jong ka Meghalaya ïa kine ki projek ka la long 10 shah da kaba kynjoh mynta sha ka 11,324 klur ha u 2025 na ka 1,300 crore ha u 2018.
Katkum ka jingong jong u, na ka bynta ki jylla jong ka thain shatei lam-mihngi jong ka ri bad khamtam kito ki jylla ba hap ha ka special category, ka ram kaba dei halor kitei ki projek kaba poi sha ka 72persen la pynsiew da ka sorkar pdeng.
“Kane ka long kum ka jingkyrshan pisa ne ka grant namar ka dei haduh 72 persen. Katba ïa ka 28 persen pat kaba dei ban pyndap (contribution) da ka sorkar jylla ngi hap ban siew lypa shwa. Kumta kam dei satia ka ram. Ka 28 persen kadei kaba ai na ka jylla bad 72 persen pat kadei ka ram kaba ai lyngba ka sorkar India shangi bad pynsiew biang da ka sorkar India ym da ka sorkar jylla,” ong u Myntri Rangbah ka Jylla.
Shuh shuh u la bynrap biang ba kane ka jingkyrshan bai sha ka jylla kam dei satia ka ram hynrei kadei ka jingïarap pisa ne kum ka grant.
Nangta u ong ruh ba dang shen ha ka jingkynduh ïa ka Myntri ka tnad Platyngka jong ka sorkar pdeng, la ong ba ka Finance Ministry ka hap ban buh noh da ka kyndon halor ka jingbun ki projek kam pynroi kiba wan na shabar (EAP) ba ki jylla ki lah ban pan.
U ong ruh kumba ka paw, kane kadei namar ka Meghalaya ka tan bun bha ki projek ba wan na shabar kumta dei na kane ka daw ka tnad ka la buh noh da u pud ba katta katta ki jylla ki lah ban pan ne ïoh ïa ki projek.
Ha kawei pat ka liang u ong ba ka Meghalaya ka phah bun bha ki jingtyrwa bad ka pyntrei hok ruh ïa ki. “Hynrei ha kaba khatduh pat dei ka sorkar India kaba siew ïa ka ram.” u la ong.
Shwa kane, u Myntri Rangbah u la ïathuh ba ka jylla ka la ïoh haduh 16 tylli ki projek kaba ka dor ka la kot sha ka 11,324 klur tyngka. U ong ruh ba kane kadei ka projek kaba heh bha haba ïadei bad ki jylla kiba rit ha ka Ri khamtam ha ki jylla jongka thain shatei lam-mihngi jong ka Ri.
“Kane kadei kaba heh tam lada nujor bad ki jylla kiba rit khamtam ha ka thaiñ shatei lam-mihngi jong ka ri,” u la ong. Shuh shuh u ong ruh ba kadei ka burom ïa ka jylla ban ïoh pdiang haduh kattei klur ki projek kam pynroi kiba wan na shabar lane kita ki externally aided projects (EAPs).