Shillong, Naiwieng 24 : U President ka United Democratic Party (UDP) bad MLA jong ka Mairang constituency, Bah Metbah Lyngdoh ha ka sngi Nyngkong u la ong ba ka dei ka kamram jong ki MLA ban pyntikna ba ka skim MLA kaba la mang lyngba jong ki man u snem ka dei ban poi baroh sha kito kiba dei hok ban ïoh.
Kane ka jingkren jong u kadei hadien ba ka la mih ka jingdawa na u President ka Voice of the People’s Party (VPP), Bah Ardent M Basaïawmoit ba dei ruh u MLA ka Nongkrem constituency ba dei ban don ka jingtohkit halor ka jingpyntreikam ïa ka skim MLA hapoh ka jylla.
Na ka liang u Bah Metbah uba bat ruh kum u Myntri ka tnad Bording haba kren bad ki lad pathai khubor u la ïathuh ba naduh ka sngi kaba nyngkong ba u shimti kum u nongmihkhmat u la pyntikna ba ka skim MLA kan poi beit 100 persen sha ki paidbah kiba dei hok ban ïoh.
Da kaba pynpaw ba lehse ka lah ban don katto katne ne khyndiat ki jingbakla hangne hangtai hynrei u la ïai ban pat ba kam dei satia ban don ka jingthmu ban leh khnang ban bam klop ïa ka bhah kyrpang kaba dei jong ki paidbah.
“Ngam ong ba nga biang lut bad ym don ruh uwei MLA ban ong ba u biang lut nadong shadong namar haba kut hap ap ïa ki jingai jingmut na kito kiba ïa trei lang ïa ka kam la ka long naduh ki Rangbah Shnong, ki Nongïalam ha ki shnong bapher bapher, ki seng longkmie, ki seng samla bad kumta ter ter. Hynrei kadei pat ka kamram jong ki nongmihkhmat paidbah haba sam ïa ka bhah jong ki paidbah dei ban sam hok,” u la bynrap biang.
Shuh shuh haba kylli ïa ka jingsngew jong u haba iadei bad ka jingdawa ban don da ka jingtohkit halor ka jingpyntreikam ïa ka skim MLA ka jubab kaba u Bah Metbah u ai ka long ba um don eiei ban pyrshah lada ka don ka jingartatien ne ka jingbym shai haba ïadei bad ka jingpyntreikam ïa ka.
