Shillong, Nailar 13 : U MLA ka NCP na Gambegre, Saleng Sangma u la ong ba kadei ka kamram jong ka Liang Pyrshah ban wad daw ne wohdong ha kino kino ki jingtreikam jong ka sorkar jylla.
“Kadei ka kamram jong ki ban kynthoh bad kane kadei ka kam ba ka AITC ka leh ha ka jingleit kylleng ki bynta jong ka Meghalaya,” la bynrap shuh shuh utei u MLA. Kane ka jingkynthoh kylla jong u Saleng kadei halor ka jingïai bteng jong ka Trinamool Congress ban kynthoh bamsap ïa ka sorkar MDA ba ïalam da ka National People’s Party.
Katkum ka jingong jong u, katei ka sienjam ba shim da ka Trinamool Congress ka long tang ban wad rynsan na ka bynta ki kyrtong kiba thmu ban aireng ha kane ka elekshon MLA na ka party.
Haba jubab halor ka jingkylli la katei ka jingleh jong ka Trinamool ka lah neem pat ban pynjop khambun ki MLA ha ka elekshon ban wan, ka jubab kaba u ai ka long, “Ym lah satia ban batai lypa namar ha kaba khatduh dei ki paidbah hi kiban ai ïa ka rai.”
Katkum ka jingong jong u, ym don mano mano ruh ba lah ban kynnoh ne kynthoh la ka long ka AITC ne mano mano ruh ba ka sorkar MDA ka long kaba bamsap.
