Dei ka jingleh donbor palat ka NPP ba phet noh, kam ki arngut ki MLA barim ba ïasoh BJP

Shillong, Nohprah 15: Shisngi hadien ba ki arngut ki MLA barim jong ka NPP ki la pynïasoh bad ka Bharatiya Janata Party (BJP) kata u Benedic R Marak and Ferlin CA Sangma ki la ong ba ka jingmih noh jong ki na ka NPP ka dei namar ka jingbym lah shah shuh ïa ka jingleh donbor jong ka NPP bad kum juh ka jingïaid lait na ki ha shuwa ban shim ïa kino kino ki rai ba ktah ïa ka constituency ba ki mih khmat.
Haba kren sha ki lad pathai khubor u MLA jong ka NPP uba mihkhmat ïa ka Raksamgre u Benidic R Marak u la ong ba ba ka daw hi ka dei ba ka NPP la shu leh donbor beit bad kino kino ki kam kaba la pynkdang ïa ki haduh ba kim banse shuh ban mih noh na ka party.
U la ong ba ka jingweng jubor ïa u na ka shuki Chief Executive Member ka Garo Hills Autonomous District Council (GHADC) da ka party ka la dei ka jingleh donbor ba palat pud ïa u kum u MDC uba ki paidbah ki la jied.
“Wat haduh mynta ngam pat ïoh jubab na u Conrad halor ka daw kaba u weng jubor ïa nga na ka shuki CEM jong ka konsil bad kane hi ka dei ka jingleh donbor kaba baroh phi ïatip lut,” u la ong.
Haba ïadei bad ka daw ba u la jied ïa ka BJP u la ong ba ka daw hi ka dei namar dei tang ka BJP kaban lah ban warah jingkylla bad ka roi ka par ha ka constituency kaba u la mihkhmat bad ka jingangnud da ki paidbah hi ba un ïasoh sha ka BJP.
U la ong ruh ba na ka liang jong u um don kano kano ka jingsngew artatien ba un wanphai biang kum u MLA ha ka elekshon namar ha kine ki san snem duna kiba la leit u la trei hok na bynta ka constituency.
“Ngi ïohi ba u Myntri Rangbah u la kam ba ka NPP kan wanrah ïa kata ka lyer ka jingkylla hynrei ka lyer jong ka jingpynjot pynban u wanrah sha ka jylla,” ther tyngeh u Benedic ïa u Conrad.
Haba la kylli la ka don ne em ka jingbabe lehse na ka liang ka NPP ba u la mih noh na ka party, u Benedic u la jubab, “Khlempep kin babe namar nga bad ka NPP ruh nga la ïadon bynta naduh ka por ba sdang da u Purno bad lada phi peit ha ka elekshon kaba la dep ki dur jong nga ka dei kawei kaba ki buh ha ki flex ba ki pynïeng ban ioh jingkyrshan na u paidbah.”
Ka Ferlin CA Sangma ka MLA jong ka Selsella ka la ong ba ka jingshah ïaid lait jong ka kum ka MLA kam dei shuh kaba dang thymmai hynrei ka pyrthei hi ka la sakhi ïa kata bad ong ba dei kata hi ka daw kaba ka phet noh sha ka BJP khnang ban lah ban trei kham bha na bynta ka constituency.
“Haba ki shim kano kano ka rai haba ïadei bad ka constituency kim ju don kano kano ka jingpyntip ne kynjoh ktien ïa nga kum ka MLA,” ka la ong.
Shuh shuh ka la ong ba na ka liang ka NPP ka la pynap lupa ban pynduh tiket ïa ka lada dei ba kam ryngkoh noh sha ka BJP.
Haba la kylli la kata ka jingpynap lupa ka dei ba lehse u Myntri Rangbah un ïakhun na katei ka constituency, “Lada phi peit ïa ka jingkren ki nongïalam ba kynthup naduh u State President u Dr WR Kharlukhi bad kumjuh ruh u National President u la kren shai ha ki sngi ba ngi hiar shuki noh kum u ki MLA ban ïasoh BJP ki la ong ba ki la dep don lupa da kiwei ki kyrtong kiba ki la pynkhreh lupa shuwa ba ngin mih noh na ka NPP,” ka la jubab.
U MLA jong ka Baghmara u Samuel M Sangma uba la weng noh kum u dkhot pynap ka UDP ban leit ïasoh noh pat sha ka BJP u la ong ba ka jingjied ka dei beit namar ka roi ka par kaba u Myntri Rangbah ka ri u la leh na bynta ka jylla wat la ka BJP kam pat ïoh synshar ïa ka jylla.
“Ka dei beit ka daw ki kam pynroi kaba la khring ïa nga sha ka BJP bad ngan kren da kaba shai ba ngam don daw bad ka UDP hynrei dei ba nga sngewthuh shai ba ki kam pynroi ha ka jylla dei tang ka BJP kaba lah ban wanrah bad ban pynurlong,” u la ong.
Haba jubab la ki don sa kiwei ki MLA kiban ïasoh sha ka BJP, u President ka BJP u Bah Ernest Mawrie u la jubab ba kumba long mynta ka party ka don ka jingïakren bad ki arngut ki MLA kiba lehse ha kine ki khyndiat sngi kin sa wan pynïasoh sha ka BJP.