Dei ka jingbym shimkhia jong ka sorkar halor ka jingpynkylla ïa ka ST Order, ong ka HYC

Shillong, Rymphang 23: Ka seng Hynñiewtrep Youths’ Council (HYC) ka la kynthoh ba ka jingpynslem jong ka Committee ban aiti ïa ka kaiphod ba tyrwa ban pynkylla noh ïa ka thup Scheduled Tribe Order 1950, ka pyni ïa ka jingbym shimkhia ka sorkar ban ïada ïa ka hok bad jingmyntoi jong ki trai ri trai muluk.
Ha kaba ïadei bad kane na ka liang jong ka seng ka la ong, “Ka seng ka la dawa lah slem bha na ka Sorkar Meghalaya bad ka Sorkar India ban wanrah ïa ka jingpynkylla ïa ka Scheduled Tribes Order, 1950 bad ka dap da ka jingsngewkhia bad jingsngewsih halor ka jingkren jong u Myntri Rangbah ka Jylla ba ka Sorkar ka dang ïai ap ïa ka kaiphod jong ka Committee ba la thaw ban eksamin ïa ka jingpynkylla wat hadien ba la dap 14 bnai naduh ba la thaw ïa ka.”
Na ka liang jong u President ka HYC u Bah Roy Kupar Synrem ha ka kyrwoh khubor, ula ong, ba ka jingbteng ban pynslem ban aiti ïa ka kaiphod jong ka Committee ka pyni ïa ka jingbym shim khia bad jingkheiñ sting na ka liang ka Sorkar ban ïada ïa ka hok bad jingmyntoi jong ki trai ri trai muluk jong ka Jylla.
“Ka HYC ka la buh jingkylli ba kan don jingmut ne jingthmu aïu ban thaw ïa kum kane ka Komiti lada ïa ka kaiphod jong ka yn pynslem ban aiti khlem da buh por. Ki trai ri trai muluk jong ka Meghalaya kidei hok ban ïoh ïa ka jingpynshai. Ka jingleh bym pyrwa bad jingkheiñ sting ban pynslem jong ki bor synshar ka pyni ïa ka jingbym kheiñ kor bad ka jinglehkai ïa ki jingmyntoi ba la buh kyrpang ïa ki trai ri trai muluk jong ka Jylla bad ruh ka pynpyrkhat sniew ba ïoh lehse ka don eiei sha lyndet,” ong u Bah Synrem.
Ka HYC ka dawa ba ka Committee kadei ban ai ïa ka kaiphod jong ka hapoh ka por ba lah buh bad ïa kata ka Kaiphod dei ban buh hakhmat u paidbah ban tip bad ai jingmut lada donkam shuwa ba ka Sorkar Meghalaya kan shim rai bad phah ïa ka jingtyrwa hakhmat ki bor kiba hajrong.