Dei ka committee na ka Supreme Court ba wan jurip ha Killing namar ki jingkynnoh pynjot mariang

Nongpoh, Naitung 14: Ka Central Empowered Committee (CEC) kaba la thung da ka ïingkashari ba hakhlieh duh ka Supreme Court ka la wan jurip ha ka shnong Killing, Ri Bhoi District, hadien ka jingujor jong u wei u nongshong shnong na Assam, u Jitul Deka, halor ka jingkynnoh pynjot mariang ha katei ka thaiñ.

Kane ka jingujor sha ka Supreme Court ka kdew ba ka jingpynjot mariang ha ki thaiñ khappud ka jylla Assam bad Meghalaya, khamtam ha Killing, ka dei ka dawbah kaba la wanrah ka jingshlei um sha ka sorbah Guwahati. Halor kane, ka Supreme Court ka la bthah ban thung ïa ka CEC ba kan leit jurip bñiah ïa ki jaka ba la kynnoh.

Ha ka 11 tarik u Naitung 2025, ka CEC ka la wan jurip ïa ki bynta bapher bapher ha Killing, kynthup ïa ka USTM, ki jaka tih maw, bad ki jaka tih khyndew, ban peit bñiah lada ka pynjot shisha ïa ka mariang kumba la kynnoh.

U Deputy Commissioner ka Ri Bhoi District, u Abhilash Baranwal, haba kren bad ki lad pathai khubor, u la pyntip ba ka ophis DC ka la ioh jingtip na ka tnad Forest ka sorkar jylla halor katei ka jingwan jurip katei ka committee bad na ka liang ka bor synshar District, kala bthah ruh ïa u Magistrate bad ki pulit ba kin synran lang ha katei ka sngi naka bynta ka shongsuk shongsaiñ.

Kane ka jingwan jurip ka dei ban wad jingshisha halor ka jingkynnoh ba ki kam tih maw bad tih khyndew ha katei ka thaiñ kala wanrah ïaka jingpynjot ïa ka mariang, bad kumba la kynnoh kadei ka dawbah ba ju wanrah ïa ka jingshlei um sha ki thaiñ khappud ka Assam bad Meghalaya.