Dei ka Budnar Shadow Squad ka HNLC kaba pynbthei IED ha Them ïewmawlong

Shillong, Lber, 13: Ka Seng kieng atiar Hynñiewtrep National Liberation Council (HNLC) ha ka sngi Palei hadien saw sngi ka la kam trai ba ka dei ka kynhun kaba la pynbthei ïa u bom IED ha Them Iewmawlong ha ka miet sngi saitjain jong ka taiew ba ladep.
Ha u kyrwoh ba la phah da u General secretary cum Publicity Secretary ka HNLC Bah Saiñkupar Nongtraw sha ki lad pathai khubor u la ong, “ngi shim ïa ka jingkitkhlieh na ka bynta ka jingpynbthei bom IED ha them metor ha ka miet 9 tarik, Lber. Ka Budnar Shadow Squad (BSS), kaba treikum kum ka Special Forces jong ka HNLC, ka dei kaba la leh ïa kane ka kam. Ka Sorkar MDA bad ka tnat Pulit ki kyndit ba ka kynhun jong ngi ka la leh ïa kane ka kam ha ka jaka ba khlaiñ ka jingpahara. Ngim don jingthmu ban pynmynsaw ïa ki paidbah ne ïa ki mynsiem ba luilui, namarkata ngi la kiar. Ka Sorkar ka dei ban weng ïa ki pulit CRPF na them metor ban pynthikna ïa ka jinglaitluid ka leit ka wan jong ki paid u Hynñiewtrep na kane ka jaka..”
“Namar ka jingbym suidniew ba la slem jong ka Sorkar Meghalaya ban pynkynriah ïa kine ki Harijan na kane ka jaka, ngim don lad shuh da kumwei pat sa tang ban shu pyni da ka bor. Kane ka dei tang ka jingpynkynmaw ba lada ka Sorkar kam lah ban ai jingïada ïa ka jaidbynriew jong ngi, ngi lah ban ïohi ba ka ri Hynñiewtrep ka lah ban poi sha u pud ka thma pohïing. Kano kano ka jaidbynriew kaba buh jingma ïa ka ri Hynñiewtrep kan hap ban mad ïa ka jingeh. Ka Sorkar ka dei ban pynkynriah noh ïa ki hapoh shi bnai ne mad ïa ka jingeh kaba khraw,” la byrngem ka HNLC.
“Ki Pulit ki don ha ka thma bad ka jaidbynriew jong ngi, bad ngin ïada ïa la ka jong ka ri bad ïa ki paidbah la ka long ha kano kano ka dur. Haba ngi ïakhun na ka bynta ka daw, jong ka jaidbynriew, kynmaw ba ngim don eiei ban duh. Ka tnat Kam Pohing ka Sorkar Jylla ka la shah pynïaid ïa ki bar jylla bad ki ophisar Pulit Khasi ki shah pynlong kum ki ‘sew beh. Haba u ophisar bar jylla u phah wiar, ki wiar, haba u ong dait, ki dait. Haba u ong kaweh tdong, ki kaweh, haba u ong mih snam, ki mih snam na ka bynta ki bar jylla. Hynrei, ha kaba ïadei bad ka jingïada ïa ka jaidbynriew Hynñiewtrep na ka jingshah thombor bad ka jingshah pynlong sohpdung ha ka kti jong ki bar jylla, ne ki Pulit bar jylla, kim don bniat ne ka snam ban jaw,” la kynthoh ka HNLC.
Haba kynthoh ïa ki arngut ki Symbud Myntri Rangbah ka Jylla, ka HNLC ka la ong, “ïa u Bah Prestone bad u Bah Sniawbhalang la pyndonkam da ki nongïalam Garo kum u Mukul Sangma bad u Conrad K. Sangma kum ki nongbah saiñpyrthei, nyngkong hapoh ka Congress bad mynta hapoh ka NPP. Ki ïasyriem kum ki kada kit blei thaw ha ka Phawar u Aesop.”
“Ngi pdiang ïa ka jingdon kaba la slem bha jong ki jaidbynriew Harijan ha ka ri Hynñiewtrep. Ngim shym la ong ïa phi mih noh na ka ri Hynñiewtrep. Ka jingthmu jong ngi kam dei satia ban wanrah ïa ka jingsngew ïapher ne ka jingpyrshah. Hynrei, ngi kyntu ïa ki jaidbynriew Harijan ban pdiang ïa ka jingpynkynriah sha ka jaka ba la ai da ka Sorkar na ka bynta ki briew jong phi bad mih noh da kaba suk ba saiñ na them metor. Ha ki snem baladep, ngi la siat ïap ïa u para jong phi, u Lal Singh, namarba ki kam runar jong u, kaba la pynmong ïa ka jingsngew jong ki jaidbynriew jong ngi,” la bynrap ka HNLC.
“Kane ka dei ka khubor kaba shai ba kino kino ki bar jylla kiba buhai shnong hapoh ka ri Hynñiewtrep, ngi pdiang sngewbha ïa phi ban shong ban sah hangne, hynrei kiar na kaba kam trai ïa ka khyndew ka shyiap jong ngi, ban pyndonkam da ka bor, ban pynibor ne ban pyndom ïa ngi hynrei lym kumta phin mad ïa ka jingap kaba shyrkhei, kumba u nongtuh um lah satia ban long u trai,” la ong shuh shuh u kyrwoh.