Shillong, Naiwieng 03 : U Myntri ka tnat Public Health Engineering (PHE) u Marcuise N Marak u la ong ba ka jingkyrduh um ha nongbah Shillong ka dei namar ka jingbym pat biang ne dep lut ka jingsam um jong ka Greater Shillong Water Supply Scheme (GSWSS-III).
“Ha ka jingshisha, ngam tip ïa ka daw balei ka don ka jingduna um. Ka lah ban dei namar ba ka GSWSS-III kam pat treikam,” la ong u Myntri da kaba bynrap ba ki la dep leh ïa ka jingpyrshang naduh ka jaka pynlang um haduh ka jaka pynkhuid um, bad ka um kaba la long 8MLD ka la poi sha ka jaka pynkhuid um ha Mawphlang.
Shuh shuh u la ïathuh ba ka jingpynpoi um kaba kynthup ïa ki 12 tylli ki zone, ka dang ïaid shakhmat ha ki katto katne ki jaka.
“Lah ban long namar ba kata ka bynta sam um jong ka GSWSS kam pat dep lut dei na kata ka daw ki paidbah ki lah ban kynduh jingeh bad ïoh duna um,” la ïathuh shuh shuh u Myntri.
U Myntri u la ong ruh ba mar ïa dep ka GSWSS – III, ka nongbah Shillong kan sa ïoh pura noh ka jingïoh umbam umdih.
“Tang shu dep ka GSWSS – III, ngi kyrmen skhem ba ngin sa ïoh pahuh ka umbam umdih ha nongbah Shillong,” la bynrap biang u Myntri.
