Dei ban thung da ka jingtohkit kaba laitluid ban sei pyrthei lut : Dawa ka Congress

Halor ka jingkhynra ki pulit ia ka farmhouse u heh BJP

0

Shillong, Naitung 24 : Ka Meghalaya Pradesh Congress Committee (MPCC) ka la dawa na ka sorkar jylla ban thung da ka jingtohkit kaba laitluid halor ka jingkynnoh ba ka don ka jingpynlong jaka awria ïa ka farmhouse jong u State Vice President ka BJP ha ka jylla, u Bernard N Marak kaba don ha Tura.
Ha ka kyrwoh ba la phah da u Vice President ka Congress, Bah Ronnie V Lyngdoh, ka Congress ka la ong, “Donkam ka jingtohkit kaba laitluid halor kane ban sei pyrthei lut ïa ka jingshisha baroh halor kitei ki jingjia khamtam eh kiba jia hajan ka iing sah jong u Myntri Rangbah.”
Shuh shuh la og ruh ba ka jinghiar khynra jong ki pulit ïa ka farmhouse ha ka sngi Saitjain kadei tang shikhmut tyrsim eh na ka jingjia kaba la jia hapoh ka jingsynshar jong ka sorkar MDA hapoh ka jingïalam jong u Conrad K Sangma bad ka party jong u ka NPP.
Katkum ka kyrwoh la ong ba kane ka la jia ruh ha ka por ba ka sorkar ka shah kynthoh bamsap ha ki liang baroh kiba haduh mynta kam pat lah ban saitkhuid.
Na ka liang ka Congress ka la buh jingkylli ruh kaei ba ka UDP ka don ban ong halor kane khamtam haba ïa ka tnad Kampohiing ka jylla la bat hi da uwei na ki MLA jong ka.
Utei u heh Congress u ong ruh ba kaei kaba ki kwah ban ïoh sngew mynta ka long na u Myntri Rangbah ban jubab khamtam haba katei ka jingjia ka jia ha constituency jong u Myntri Rangbah hi.
Ka kyrwoh ka ong ruh ba katei ka resort jong u Marak kaba shah khynra ha ki pulit kam da jngai eh na ka jaka sah jong u Myntri Rangbah bad kumta kin ym sngewlyngoh ba ïoh don na kiba shah kem kiba dei ki nongbud ba hajan jong ka NPP.
Ka Congress ka kyntu ïa u Myntri Kampohiing ba un jubab balei ka shimpor ban hiar khynra ïa katei ka jaka. Ka buh jingkylli ruh la kadei ba don ka jingpynbor na ka BJP lane ba ka don ka jingsngewthuh jingmut hapdeng u Marak bad ki nongïalam Garo kiba don ha ka NPP.
Shuh shuh ka la ong ruh ba donkam ban peit da kawei pat ka rukom halor ka jingkynnoh da u heh BJP pyrshah ïa u Myntri Rangbah ba katei ka jingkhynra kadei namar ka jingsyier ïa ka South Tura seat
“Hato u Myntri Rangbah un mih ban ïathuh ïa ki paidbah ka jylla halor ka jingpynslem jong u bad ki pulit ban khynra? Hato ka dei ka jingshisha ba un sngap jar lada ka BJP ka iehnoh ïa ka South Tura ha ka NPP?” buh jingkylli biang ka Congress.
Na ka liang ka Congress ka ong ruh ba katei ka jingjia shah khynra ka farmhouse jong u heh BJP ka la buh ruh shibun ki jingkylli halor ka lawei jong ka jylla hapoh ka jingïalam jong u Myntri Rangbah bad Symbud Myntri Rangbah ka jylla.

Leave A Reply

Your email address will not be published.