Shillong, Nailar 30: U CEM ka KHADC, u Bah Titosstarwell Chyne, u la ong ba ka ïewduh ha ka jingshisha kadei ka ïew kaban aikam aijam ïa kiba bun ki samla jong ka jylla, hynrei namar ba bun ki trai ri trai muluk kim pynïaid hi ïa ki dukan, hynrei la bun kaba ai sha ki bar jylla, kumta kane ka khanglad ïa ki Samla ban ïoh kam ha kane ka ïew u khun khasi khara.
Haba kren ha ka jingïalang ha ïewduh mynta ka sngi na ka bynta ban buh ïa u mawnongrim ban tei ïa ka ïew dielang, nangta ban pyntreikam ïa ki CCTV bad PA System bad ban plie ïa ka jingpynbha ïa ka jaka lehniam ha Khlieh ïew, u CEM, u la ong ba ki trai ri trai muluk ki bym lah ban pynïaid ïa kine ki dukan, kidei ban aiti noh sha ka Hima Mylliem bad ka Hima pat kan aiti sha ki Samla ki bym donkam donkam.
U la ong ba ki don kumba san hajar tylli ki dukan ha ïewduh, hynrei um tip pat katno tylli la bat da ki bar jylla. “Ka por ka ladei ba ki trai ri trai muluk kin shimti noh ïa la ki jong ki dukan ne ki basa ha ïewduh bad lada kim lah dei ban aiti noh sha ka Hima Mylliem bad ka Hima kan aiti pat sha ki Samla bym donkam donjan”, u la ong.
U la ong ruh ba ka Hima Mylliem kadei ban don ka bor ban shna ïa ki kyndon na ka bynta baroh ki basa kiba don ha ïewduh.
Lah ban kdew hangne ba ka ïewduh kaba long ka ïew kaba la rim tam ha ka jylla, ha kaba ka la don kumba arspah snem eiei, ha ka jingshisha kadei ka ïew niam jong u khun khasi khara naduh mynnor. Pynban katba nang mih ki sngi, kiba bun ki trai basa ki la aiwai noh sha ki bar jylla ïa ki basa jong ki bad namar ba ka aiñ jong ka District Council ka shah ïa ki bar jylla ban khaïi lada ki la ïoh laisen khaïi na District Council, mynta palat 80 percent ki basa ha ïewduh la pynïaid da ki bar jylla katba ki trai ri trai muluk pat ki shu shong ha ki madan bad ha ki tyngkhap jong ki dukan.
