Dei ban pynshitom ïa kiba thied masi lada ki pynkheiñ ïa ka CAA, 1960, bthah ka Ïingkashari

Shillong, Lber 22: Ka Ïingkashari Meghalaya High Court ha ka sngi Thohdieng, ka la hukum ïa ki bor ka Sorkar Jylla ba kan shim ïa ka sienjam ban pynshitom pyrshah ïa ki nongthied masi lada jia ba ki pynkheiñ ïa ka Prevention of Cruelty to Animals Act, 1960.
Haba pynwai ïa ka writ petition, ka Ïingkashari ba la khlieh da u Chief Justice IP Mukerji ka la ong, “Namar ka hukum ba 26 tarik Jymmang 2023 ba pynwai ïa ka writ petition ba ha shuwa (PIL No 2 of 2021), ym donkam shuh ban pynmih ïa kawei pat ka hukum ha ka mukotduma lait noh tang ka jingbthah ïa ki bor ba dei khmih ba kin bud pyrrkhing bha ïa ka hukum ba 26 tarik Jymmang 2023 bad ruh ban pynthikna ba ki nongthied masi kin bud pyrkhing ïa ka Act bad ka Rules bad ba ki bor Sorkar ki dei ban shim ïa ka sienjam ban pynshitom lada jia ba pynkheiñ aiñ”.
Kane ka mukotduma ka dei kaba la mudui da ka Dhyan Foundation-ka Non-Governmental Organisation bad ka Tankala Naga Chandrani kiba mudui pyrshah ïa ki artylli ki hukum jong ka Jylla ba 21 tarik Nohprah, 2018 bad 8 tarik Rymphang, 2019.
Kine ki hukum ki kren halor ka jingithuh bad pynkha ïa ka Gaushala ban buh ïa ki masi bad ki jingri jingdup ba la ïoh kurup da ki bor Sorkar ha lane hajan ki jaka khappud ka Meghalaya bad Bangladesh, kiba thmu ban khaïi tuh.
Ki nongmudui ki sngew ktah da ka kyndon ha kine ki hukum ba bthah ïa ki borkhmih ba ki dei ban ïoh ïa ka hukum na ki bor ka ïingkashari ban die ïa ki masi ba ïoh kurup.
U nongïasaid aiñ jong ki nongmudui ula pynpaw ba lada ïa ki masi la die, ki bor khmih kin ym lah shuh ban leh eiei ïa kaei kaba u nongthied u leh ïa kine ki masi bad ka jingïaid katkum ka Act bad ka Rules.
Ïa ka PIL No 2 of 2021-Gua Gyan Foundation vrs Union of India & Ors la pynwai noh da ka Division Bench lyngba ka hukum ba 26 tarik Jymmang, 2023.