Shillong, K’Lyngkot 02 : Ka North East Students’ Organisation (NESO) kaba dei ka kynhun jong ki seng samla pule na ki 8 tylli ki jylla, ka la dawa ban pynshitom da kaba tyngeh syndon ïa kito kiba donkti ha lyndet ka jingshah pynïap ba shyrkhei ïa u Angel Chakma u ba dei u samla pule ba 24 snem ka rta na Tripura.
Ha ka shithi sha u Myntri Rangbah ka Uttarakhand u Pushkar Singh Dhami, u Chairman ka NESO u Bah Samuel Jyrwa u la ong, “Ka NESO ka pynrem jur ïa kum kine ki kam thombor pyrshah ïa ki paidbah nongshong shnong ka thain shatei lammihngi.”
U la pynkynmaw ïa u Myntri Rangbah ba kum kane ka jingshah lehbeiñ ka dei ka jingma kaba ju jïa man ka por ïa ki samla pule bad ki nongshong shnong na kane ka thaiñ ha kylleng ka ri India.
“Ngi dawa ïa ka jingpynshitom kaba tyngeh ïa ka kam runar kaba shyrkhei mardor bad ban don la kumno kumno kawei ka thanat pulit kaba kyrpang kaba la aiti kyrpang kiba ïadei bad ka jingshah thombor ïa ki paidbah na ka thain shatei lam-mihngi jong ka Ri,” la bynrap biang u Bah Samuel Jyrwa.
Lah ban kdew hangne ba u Chakma u la shah pynmynsaw jur ha Dehradun ha ka 9tarik Nohprah, 2025 bad u la khlad noh na ka jingmynsaw ha ka 26tarik Nohprah hadien ka jingsumar ha hospital kaba la neh kumba ar taiew.
