Dei ban pynsangeh shisyndon ïa ki kam tih be-aiñ, dawa ka BJP halor ka jingïap u Dilseng
Shillong, K’Lyngkot 11: Ka jingkhlad u Dilseng M Sangma, uba la shah thombor ha ka kynhun kiba donkti ha ka tih maw beain kala pynlong ïa ki briew kiba la shai bad kiba la nang la stad jong ka jylla ha ka jingkyndit, jingsngewsih bad jingbym lah ngeit kaba khraw.
Katkum ka kyrwoh khubor ba la pyllait da u Bah Mariahom Kharkrang uba dei u nongaiktien jong ka BJP Meghalaya Pradesh u la ong, Ka BJP Meghalaya ka ïa snoh lang bad kiwei pat ki nongshong shnong ha kaba sngewsih ïa ka jingduh noh ïa ka jingim briew, kaba la knieh jubor noh ha ka jingpynïap kaba shyrkhei.
Ka jingiap jong kano kano ka jait ka wanrah ïa ka jingsngewsih kaba khraw, hynrei ka jingpyniap briew ka ktah ïa ka dohnud jong u wei pa u wei u briew.Kaba pynsniew shuh shuh ïa ka jinglong jingman bad kaba pynlong ïa ngi ban sngewsih arsien ka long ba u samla u dei na ka jaitbynriew Garo, ka jaitbynriew kaba ka jingnoh synniang jong ka sha ka jylla ka long kaba ym lah ban thew u la ong,
U Bah Kharkrang u la ong, Kane ka jingjia kaba shyrkhei, ka wanrah biang ïa ka jingma jong ka jingtih maw beain ha Meghalaya bad ki jingma kaba mih man ka por na ka.Ka jylla ka la sakhi ïa kum kine ki jingjia ha ki por ba la dep ha kylleng ki thain, la ka long ha ri lum Jaintia ne ha ri lum Khasi, kane ka jingjia ha ri lum Garo ka shu pyndap ïa ka thup kaba jrong jong ki kam runar bad ki jingjia ba sngewsih jong u briew kiba mih na ka jingsniew kaba donkam ban pynduh jait noh mardor.
Shuh shuh u Bah Kharkrang u la ong, Katba ka dawa ïa ka jingpynshitom kaba tyngeh ïa ki nongleh kam sniew ka kam runar, ka BJP ka kyrpad ïa u Myntri Rangbah ka Jylla ban pynthikna ba ha kane ka kynti ka bor synshar kan leh tyngeh ban kem ïa ki briew kiba donkti.
“Ïa ka mukotduma baroh kawei jong ka jingtih maw beain ha kylleng ki bynta hap ban da tohkit bniah bad ban pynsangeh noh shi syndon ïa ki kam beain bad uwei pa uwei u briew uba donkti hap ban pynngat ha ki kyndon aiñ.Lym kumta ki ummat kin dang ïai tuid na ki khmat jong ki longkmie ha kylleng ka jylla Meghalaya” ong u Bah Kharkrang.