“Dei ban pyndonkam ïa ki kyntien ‘Map bad Khublei’ haba bakla bad ïarap kylliang, ong u ma Dhar

Jowai, Ïaïong 26: Ka Shad Sukra jong ka Sieñ Raij Ialong kala poi noh sha kaba kut mynta ka sngi 26 tarik ha ka jingiphuh iphieng, ha kane ka sngi la wan ban sakhi lang da u kongsan uba dei u myntri sorkar ba dei peit ïa ka tnad Urban Affair u ma Sniawbhalang Dhar.
Na ka liang ki khun ka Seiñ Raij Ialong kila ïa mih shitrhem da ka jingkmen hala ki jong ki riam ki beit, ki jingdeng kpieng bad kiwei de kiba dei ki riam tynrai jong ka riti ka Dustur.
La pynsngew ba kane ka shad sukra ka long shi bynta ban ai nguh ïa ka mei mariang kaba die ka nongsumar sukher bad ka nongpyndap pynbiang ha baroh ki saw aiom ïa u khun bynriew, ïa kane ka Shad Sukra la leh kum ka dak hashwa ba ki khun ki hajar kin hiar leit rep sha ki hali ki pator.
La don haduh 23 tylli ki kynhun kiba la shim bynta ha ka jingshad Sukra ba kynthup ïa ki khun samla bad ki longkmie kiba la shad hapdeng ka jingsakhi jong ki hajar ngut jong ki khun ka Raij bad kiwei de na ka shnong ba marjan.
Naka liang u ma Sniawbhalang Dhar haba ai jingkren ha kane ka sngi ula pynpaw ka jingaikhublei ïaka Seiñ Raij Ialong kaba la pynlong manla u snem ïa kane ka Shad Sukra hadien shi sngi jong ka ‘Noh Sakyriat’, kane ka long shi bynta ban pynpaw pyrthei ïa ka ñiam ka rukom jong ki longshwa manshwa. Ula ong ba mynta ki khun ka ñiamtrai kila long kiba khampher haba ïa nujor ba ki por ba la leit naduh ka jingnang jingstang bad ka akor ka burom kila long kiba la kiew ha baroh ki liang.
Shuh shuh ula ong ka jaitbynriew napoh ka Ri-Lum Jaiñtia kila nangkiew wat ki samla mynta kiba buh hi ki dei kiba la nang la stad ha ki kyrdan bapher bapher bad u kymen lyngba ka jingpyndep ïa kane ka shad sukra kyrmen yn ïoh kheit ïa u kba u khaw uba seisoh.
Da kaba u pynkut ïa ka jingkren ula kyntu kum ki briew dei ban pyndonkam ïa kine ki ar tylli ki kyntien ha ka jingim kata ‘Map bad Khublei’, namar khlem kine ki kyntien hangno pat yn pyndonkam ïa ki khamtam haka por ba ngi bakla bad kumjuh ha ka por ba ai khublei kylliang, ong u ma Dhar.
Ïa ka jingïalang la pynïaid da u ma Stanlyroy Mulieh, ha ryngkat ka jingdonlang u MLA ka Sutnga Siapung ma Shitlang Pale, u MLA barim ma Sing Mulieh, u Dolloi ka Elaka Jowai ma Puramon Kynjing, u Waheh Shnong ka Ialong ma T. Ram Phawa, u MDC ma Eveningstar Tron, ki nongïalam ka Seiñ Raij Ialong bad kiwei de kiba la shah khot sngewbha.