Dei ban pyllait ïa ki jaka riewlum na ki kyndon ka MoEFCC, da ka Official Resolution mynjur ka KHADC

Shillong, Risaw 22 : Ka Ïïng Dorbar jong ka Khasi Hills Autonomous District Council (KHADC) ha ka sngi Balang ka la mynjur da ka Official Resolution ban kyntu ïa ka sorkar pdeng ba kan pyllait noh ïa ki jaka riewlum na ki kyndon jong ka Ministry of Environment, Forest and Climate Change’s (MoEFCC) kaba ka pynmih lyngba ka office memorandum (OM) kaba pyllait na ka jingpynlong ïa ki jingïalang paidbah ha shwa ban tih ne khlong ïa kino kino ki marpoh khyndew kynthup ïa u Uranium.
Haba wanrah ïa kane ka Resolution, u CEM ka KHADC u Bah Winston Tony Lyngdoh u la ong, “Ka ïïng dorbar ka rai ban kyntu ïa ka Ministry of Environment, Forest and Climate Change bad kumjuh ïa ka Sorkar India ban weng noh ïa ka jingpyntreikam ia ka Office Memorandum kaba 08 tarik u Nailur 2025, hapoh u pud u sam jong ki jaka riewlum ba hap ha KHADC.”
U CEM u la pynpaw ba ka OM kan pynduh ïa ka hok jong ki trai ri trai muluk ban pynpaw ïa ka jingpyrshah. U la kynthoh ba kane kan wanrah ïa ka jingshim jaka bad ka jingpynjot ïa ka mariang. U la iathuh ruh ba shwa kane ka KHADC ka la thoh sha u Secretary ka Ministry da kaba dawa ban pyllait noh ïa ki jaka kiba hap hapoh ka jingpeit jong ka district council na ka jingpyntreikam ïa ka OM.
Haba kyrshan lang ïa kane ka Resolution, u Nongïalam ka Liang Pyrshah ha KHADC, Bah Titosstarwell Chyne u la pynpaw ba ka office memorandum ba la pynmih da ka Sorkar Pdeng ha ka 08 tarik u Nailur kan don ka jingktah kaba jngai bha ïa ka jylla, kaba pynsngap jar ïa ka sur jong ki trai ri trai muluk da kaba pynduh noh ïa ki jingïalang paidbah.
U Bah Titos u la ban jur ba ki paidbah ka jylla kynthup ïa ka KHADC ki ju pyrshah beit ïa ka jingtih Uranium. U la kdew ba ka Centre ka la pyrshang bunsien ban tih ïa u Uranium ha ka jylla, hynrei ka la ïakynduh ïa ka jingpyrshah kaba jur na ki paidbah.
Shuh shuh u la ai jingmut ba ka Executive Committee (EC) ka dei ban dawa weng noh ïa ka OM, ym ban shu wad ban kyntait ïa ki jaka ba hap hapoh ka jingpeit ka KHADC.
. U la kynthoh ba lada ka EC ka dawa tang ban weng noh, kan mut pat ba la shah ban tih Uranium ha kiwei pat ki jaka, kum ha Jaintia Hills ne ha Garo Hills.
“Kane ka office memorandum kan ktah ïa ka jylla baroh kawei, kumta ban ong kyntait ïa ka Khasi Hills, ka Resolution kam da khlaiñ satia. Kumta nga ai jingmut ba ngin dawa weng noh ïa ka OM,” la kyntu shuh shuh u Bah Titos.