Dei ban phah tohkit Magistrate ne Ïingbishar halor ka jingpyndonkam bakla ka pisa MGNREGA

Shillong, Ïaïong 28: Ka Confederation of Meghalaya Social Organisations (COMSO) ha ka sngi Nyngkong ka dawa ba dei ban thung noh da ka jingtohkit magistrate ne ka jingtohkit ka Ïingbishar (judiciary) halor ka jingkynnoh ba ka don ka jingpyndnkam bakla ïa ka pisa ka Mahatma Gandhi National Rural Employment Guarantee Act (MGNREGA) hapoh ka Demdema C&RD Block lyngba ki job card kiba thok bad kiba beaiñ bad ka jingpynkynriah ïa ka bai bylla sha ka account jong kiwei pat ki job card holder.
Ha ka shithi sha u Deputy Commissioner of West Garo Hills district, ka COMSO ka la ong, “Ngi dawa ïa ka jingthung jong ka High-Level Magisterial Inquiry, bad kaba kham kwah ka dei hi ka jingtohkit da ka Ïingbishar ne Judicial Inquiry, ba kan long kaba laitluid bad ka bym shahliang ban tohkit halor kane ka jingshah kynnoh ba pyndonkam bakla ïa ka pisa, ka jingaiti ïa ki job card ba shu thok, bad ka jingpyndonkam bakla ïa ka bai bylla.”
Ka COMSO ka la dawa ruh ïa ka jingdonkam ban pynsangeh kam shipor kaba mardor ïa ki ophisar, kynthup ïa DEO, ka jingtohkit kaba sah, khnang ba kan ïada na ka jingtuklar da ki digital record bad ban pynhikna ba kan don ka jingtohkit kaba khuid nalor ka jingpynlong ïa ka audit kaba dei hok jong baroh ki job card ba la sam bad ka bai bylla ba la sam da ka Demdema C&RD Block ha kine ki san snem ba la leit jong ka snem mang tyngka.
“Ngi dawa ruh ba kan dei ban don ka jingpynshitom lyngba ka aiñ pyrshah ïa baroh ki riew shimet kiba la lap ba ki la leh bakla haba ïadei bad ki kam pisa, ki jingïalam bakla bad ka jingduh ka jingshahniah na ka daw kine ki kam runar,” ka la ong da kaba pynpaw ba ka donkam ban pynkylla ïa ki jaka treikam bad ka jingïada ïa ki, kaba kynthup ruh ka jingpynshisha kaba khlaiñ ïa u Aadhaar ne ka Aadhaar verification system, ka jingleh audit kaba manla ka por da ka third-party, bad kiwei kiwei.
Na ka liang ka COMSO ka la phai ruh sha ki jingkheiñ ba la pynshisha kaba la dei naduh ka tynrai, ha kaba ka la kynnoh ba la don bun ki aiti ïa ki job card ba thok bad kiba beaiñ kiba la sam hapoh kane ka block hapdeng ki snem 2020-2021 haduh 2024-2025.
“Ki Detailed examination ki pynpaw ba ki don bun ki Job Card ba la sam hapoh ka Demdema C&RD Block ka la nangkiew, khamtam hapoh ka Village Employment Council (VEC) kum ka Bhangarpar bad Bangalkhata (Muslim), ha kaba ka jingdon ki Job Card ka la tam wat ïa ka jingdon ki briew kiba thep vote,” ong ka COMSO da kaba bynrap, “Ki jingtohkit ki kdew ba ka lah ban don ka jingleh ïa ki kam ba thok, ba la kynnoh ba la ïalam da ki katto katne ki ophisar, kum u Data Entry Operator, u Dildar Attaullah Reza, ha kaba ïa kane ka kam jong u donkam kyrkieh ban khmihbniah bha.”
Shuh shuh ka la kynnoh ba ki don ki khep ba ïa ki khynnah rit ruh la buh lang hapoh ka thup ki job card holder, bad ïa ki bai bylla ka thep sha ki riew shimet ki bym lah ban leh ïa kane hynrei la leh da kaba shu pynbeij lyngba ki Aadhaar-linked account.
“Kine ki pynpaw ïa ki jingdkoh ki rukom treikam ki bor pynïaid, ka pynduhlad ïa kiba dei hok ban ïoh jingmyntoi, bad ka pynsniewdur ïa ki rukom treikam jong ka sorkar haba ïadei bad ki thaiñ nongkyndong,” bynrap shuh shuh ka COMSO ha ki jingujor jong ka.