Dei ban phah tohkit ban lap ïa ki High Level ba pynïaid beaiñ ïa u dewïong na EJH sha Malidor: EJNC

Khliehriat Lber 22: Kawei na ki sengbhalang napoh ka district, ka East Jaiñtia Natioanl Council ka la ai jingmut ïa u Deputy Commissioner ba dei ban thung noh da ka jingtohkit kaba laitluid halor kane ka kam dewiong khnang ban dup lap ïa kita ki briew kiba kam ïa lade ba ki dei kita ki High Level kiba ju don kti ha kaba pyniaid bad shalan beaiñ ïa u dewiong na East Jaiñtia Hills District sha Malidor, Assam.
La ong ruh ba ki don ki signbord ba la buh ha kylleng ki jaka, ha kaba u District Magistrate ka East Jaiñtia Hills District u la pynbna ba la kurup ne (seized) noh ïa u dewiong hapoh ki kyndon jong ka MMDA Act kaba hapoh ka section 21 section 4 “Na ka liang ka seng ngi dap da ka jingsngew lyngngoh ban iohi ba u District Magistrate u la kurup ïa u dewiong hapoh ka MMDA Act, namar katkum ka jingtip ka seng ba haduh mynta kam don satia kata ka MMDA Act ha ri India, te ban ioh ïa ka shai halor kane na ka liang ka seng mynta ka sngi ka la leit ban ia kynduh ïa u Deputy Commissioner ka EJHD bad pan ïa ka jingpynshai halorkata ka MMDA Act bad ha kaba iakren bad ki dkhot ka seng, u Deputy Commissioner, u Abislah Banarwal u la pynpaw ba ka jingshisha ka dei ka MMDR Act bad ka dei tang ka jingbakla jong kiba thoh ïa ka signboard, te hadien ba ka jingthoh ha ka sighbord ka la saphriang na ka liang u paidbah ki la pan jingmut ba balei ba kynsan kynsan ïa u dewiong jong ki la kurup noh bad na ka liang u DC u la kren shai ba kane ka jingkurup noh ïa u dewiong ka dei kaba la bhtah da ka sorkar MDA bad kata ka long hadien ba ki Chief Justice na ka High Court ki la wan ban jurip bad wad bniah halor kane bad ha ka jing jurip ki la suba jur ba une u dewiong u dei uba mih na kaba tih beaiñ ïa u dewiong bad dei halor kane ka nongrim ba ka sorkar jylla ba ka kurup ïa une u dewiong” ong u President ka EJNC, u bah Sambormi Lyngdoh.
La bynrap ruh ba ka seng ka la iohi ïa ki jingeh jong ki paidbah hapoh ka district hynrei kaba pynsngew sih bad kaba pyn sngew phylla ïa ka seng ka long ba lyngba ka jingiadei jong ki bar jylla kiba na Assam bad kita ki briew kiba kam ïa lade ba ki dei ki High Level ka buh jingeh ïa u paidbah uba dang don mynta hapdeng ka jingeh namar ïa u dewiong jong ki u la shah kurup noh ha ka sorkar, hynrei kaba sngew lyngngoh ba kine ki bar jylla kiba don ka jingiadei bad kine ki High Level ki la pyniaid beaiñ ïa u dewiong na East Jaintia Hills District sha Malidor, Assam, kumta mynta ka ba phylla ka la long ba hato kane ka jingkurup ïa u dewiong ka dei tang ïa ki rit ki ria ne ka long solonsar ïa baroh? Buh jingkylli ka seng “namar lada ïa u dewiong la kurup da la sorkar hato naei pat kine ki High Level ki dang ioh ban pyniaid ïew ïa u dewiong sha malidor.