Dei ban pan ki jingïarap na sorkar pdeng ban wad ïa ki shikurim ba jah ha thaiñ Sohra, ong ka BJP

Shillong, Jymmang 31: Ka state BJP ha ka sngi Saitjaiñ ka la kyntu ïa ka sorkar jylla ba kan pan shuh shuh ki nongtrei bad ki jingïarap haba ïadei bad ki kam teknikal na ka sorkar pdeng khnang ba ki shi kurim kiba la jah rngai na jylla Madhya Pradesh yn lah ban lap khlem da pynslem shuh.
Halor kane na ka liang u General Secretary ka BJP u Bah Wankitbok Pohshna u la ong ba ka jingjia ba dangshen jong ka jingjah ki shi kurim kiba wan jngohkai sha kane ka jylla ka la wanrah ka jingsngewkhia bad na ka liang ka party ka sngew ba donkam ban kyntiew ïa ki lad ki lynti kiba ïaid lang bad ki sienjam kiba heh kiba dei bad ki kam digital; kaba la maitphang da ka sorkar pdeng ba la ïalam da u Myntri Rangbah duh ka ri u Narendra Modi.
U la ong ba ka party ka ai jingmut ba baroh ki hotel, resort, guest house, homestay, service apartment bad kiwei ki kam khaïi ba ïadei bad ki kam jngohkai, dei ban register bad ki agency jong ka sorkar. Kane kan pynthikna ba ki tourist ki lah ban register lyngba ki hotel jong ki, ki homestay bad kiwei da kaba pyndonkam ïa ki digital application ne QR code.
Kane kan dei ban long kaba donkam naba kane kan ailad ïa ka sorkar ban khmih ïa manla iwei pa iwei kiba wanrung sha ka jylla; kaba long kaba donkam ym tang na ka liang ka kam jngohkai bad kumjuh ruh na ka liang ka jingshngaiñ jong ka jylla, u la ong da kaba bynrap ba ka jingpyndait ïa ki CCTV dei ban pynlong kongsan ha baroh ki hotel, guesthouse haba ka jingrung jingmih jong ki guest yn lah ban ring dur ha ka por kaba dei.
U Bah Pohshna u la ong ba ha ki jaka kiba sha nongkyndong ha kaba ka mobile network kam lah ban treikam bha, ka sorkar jylla dei ban pyrkhat ïa ka jingpyndon ïa ki wifi ne ka satellite linked communication bad ki networking service ha ki police outpost bad ki tourist information center na ka bynta ki jingdonkam ban phah ïa ki khubor bad ki jinglah ban khmih bniah halor ki kam jngohkai.
Ïa ki Tourist information center dei ban don ha ki jaka kiba don hajan ki jaka jngohkai khnang ba yn ym don kiba shah ieh khlem da peit ha kano kano ka por.