Shillong, Nailar 20 : Ka United Democratic Party (UDP) lyngba u Vice Chairman jongka U Bah P.T.Sawkmie, MLA barim ka Mawlai mynta ka sngi u la pynpaw ba ki surok ha baroh ki shilynter jong ka nongbah Shillong ki la jot la pei lut bad ka la donkam ban shimkhia kyrpang ban maramot na ka liang ka PWD kloi katba lah ban kiar na kino kino ki jingma, kiba lah ban ktah ïa ka ïaid ka ïeng ki paidbah.
“Kumjuh ruh ban kiar na kino kino ki jingjia basngewsih na ka bynta ki nongïaid nongïeng, nongleit nongwan ha surok,” ong u bah Sawkmie.
U la bynrap, “ Kumba ngi la ïohi bun ki long heh long haiñ jong ka sorkar ki ïaid na kine ki surok kiba la jot la pei, hynrei ngi sngewlyngngoh pat ba ym don uwei ruh ban pynsngew ïa kane sha ka tnad PWD ”
Shuh shuh u la pynpaw ba u la ïohi bad sakhi ki don katto katne ki surok kim long shuh wat tang ban ïaid, hynrei bym don da kawei pat ka surok, kim banse ban ïaid.
Kumta u bah Sawkmie u kyntu ïa u chief secretary jong ka jylla ba un tuklar lem, balei ba ka tnad PWD kam shym la leh ei ei ïa kane ka bynta kloi katba lah ban kiar ne lait na ki jingkynthoh ba har rukom na ki paidbah.
