Dei ban long trei noh tang 5 sngi ha ka shitaïew, ai shuti noh sngi Saitjaiñ, dawa kiba trei Bank

Shillong K’ Lyngkot 27: Kum ban pynkhlaiñ ïa la ki jingdawa, ki nongtrei hapoh ki jaka kynshew pisa ne Bank ba don hapoh ki shatri bapher bapher jong ka United Forum of Bank Union ha ka sngi baar ki la pynlong ïa ka jingïakhih ha phyllaw jong ka State Bank of India Shillong Branch na ka bynta ban dawa ban ai shuti noh ha ka sngi Saitjaiñ bad ban long trei noh tang san sngi ha ka shitaïew kumba long lem kiwei pat ki nongtrei kiba ju ïoh shuti ha ka sngi Saitjaiñ.
Ha kane ka jingïakhih (Strike) kaba la pynlong ha kane ka sngi ki nongtrei na ki Bank bapher bapher ba don ha ka jylla ki la ïashim bynta lang ha kane ka jingpynlong ïa ka jingïakhih ba shisngi.
Kum ban pynpaw ïa ki daw jong kane ka jingïakhih, haba kren sha ki lad pathai khubor u Convener jong ka United Forum of Bank Union Meghalaya Unit u Bah Wanraplang Mawroh u la ong ka jingïakhih ka kynhun ka long ban dawa beit ban long trei noh tang san sngi ha ka shitaïew bad ka sngi Saitjaiñ ki dei ban ai shuti ym dei tang ha ka taïew ba ar jong ka sngi Saitjaiñ bad taïew ba 4 jong ka sngi Saitjaiñ.
Na ka liang ong u, u la ong ba kane ka jingïakhih kam dei pyrshah ïa ki paidbah hynrei ka dei na ka bynta ka koit ka khiah jong ki nongtrei Bank baroh.
Shuh shuh u la ong ki don kiwei ki pat mat jingdawa kum ka jingduna ki nongtrei kat dang mih ki snem hynrei ka jingïakhih ha ka sngi baar ka dei beit halor ka jingdawa ban dei ban longtrei san sngi.
Na ka liang u Secretary u Bah Davis Lyngdoh u la ong ka kynhun ka la mynjur bad tyrwa ban trei noh 40 minute ha kiwei ki sngi hadien ba ka kynhun ka la dawa ban ai shuti noh ha ka sngi Saitjaiñ.
Shuh shuh utei u nongïalam u la ong lada 40 minute ki trei ha kiwei ki sngi haduh sngi Thohdieng, ka mut ba ka la ïaryngkat bad ka jingai shuti ha ka sngi Saitjaiñ.