Shillong, Risaw 31: Ka NEHU-Deen Dayal Upadhyay Community College for Skill Development (NEHU-DUCCSD), kaba dei college kaba don bynta bad ka North-Eastern Hill University (NEHU), ka la pynkut noh ïa ka prokram “Entrepreneur Development” kaba 4 sngi kaba dei ka prokram ai jinghikai kaba thmu ban pynkupbor ïa kiba kwah ban sengkam lajong hapoh ki shnong ki thaw. Ïa kane ka prokram la pynlong naduh ka 28 tarik haduh ka 31 tarik u Risaw, 2024, ha kaba ka la khring ïa bun ki kynhun bapher bapher kiba la kwah ban shim bynta ban ïoh ïa ki buit bad ki jingtip kiba kongsan ban pynkylla ïa ki jingmut bashem thymmai jong ki sha ki kam khaïi.
Hapoh ka jingïalam jong ka kong Jacqueline Nongkhlaw, Director ka PNB Rural Self Employment Training Institute (RSETI) ha East Khasi Hills District, Meghalaya, kane ka prokram ka la ailad ïa ki nongïashim bynta ba kin ïoh ki jingmut ba kordor hapoh jong ki bad ki tiar ba kin leh ba kin pyntyllun ïa ki jingsengkam lajong.
U Prof. Prabha Shankar Shukla, Hon’ble Vice-Chancellor ka NEHU, bad Prof. S. M. Sungoh, Principal in Charge ka DDUCC, ki la banjur ïa ka jingaiti met bad mynsiem jong ka university ban kyntiew ïa ka mynsiem jong ka jingkwah sengkam lajong bad ban wanrah jingthymmai hapoh ka thaiñ. “Ka jingthaw, ka jingshem thymmai bad ka jingrai kut ki long ki jingpyrshang kiba kongsan,” ki la ong, da kaba banjur ïa ka jingaiti jong ka NEHU ban kyrshan ïa ki shnong jong ka Jaiñtia Hills lyngba ki jinghikai kiba thymmai.
Ha ka prokram ai khublei kiba la shim bynta ki long Dr. Davidson Pyngrope, Public Relation Officer (PRO) ka NEHU, kum kongsan. Ha ka jingkren u la pynpaw ïa ka jingdonkam ban jop haba sengkam lajong da kaba bynrap, “Sha lyndet jong baroh ki jingjop ki kam khaïi kadei u nongsengkam lajong uba mad ïa ki jingeh bym lah ban hynñiew hynrei uba la ïeng beit ban pynïaid shakhmat ïa ki kam.” U la ai mynsiem ïa kiba shim bynta da kaba pynkynmaw ba ka jingjop ka dei ka jingïaid lynti na ka jingpulom hynrei khlem da duh ïa ka mynsiem ka jingshitrhem. Manla ki kam khaïi kiba jop ki sdang na ki kam kiba rit kumta u nongsengkam uba dang samla ym dei ban duh mynsiem da ka jingheh ka jingsdang hynrei ban ïaid shakhmat ban kynjoh sha ka jingjop.”
Ïa ka prokram la pynkut da ka jingai khublei na u Bah Wolnish Rymbai, Program Coordinator, bad ka jingsam ïa ki syrnot.
