Dei ban leh ïa ka Fires Safety Audit bthah ka DC ïa baroh ban ïada na ka jingpluh ding

Shillong, Rymphang 21 : Ka Deputy Commissioner bad Chairperson jong ka District Disaster Management Authority (DDMA) ka East Khasi Hills ka la bthah ïa baroh ki iing bad ki jingtei ba don ha Distrik ba ki dei ban leh ïa ka Fire Safety Audit bad ban aplai ïa ka Fire Clearance Certificate/Fire No Obection Certifcate (NoC).
Katkum ka kyrwoh la ong ba kane ka jingbthah kadei hadien ba ki ïohi ba ka don ka jingnang kiew ka jingpluh iing ha ki shnong ki haw, ki jaka long ïew, ki jaka pule, bad ki ophis treikam kiba don ha ka distrik.
Shuh shuh la ong ba kane ka jingbthah ka treikam ïa baroh ki jingtei kiba pynlong dukan, ki jaka pule, ki hospital, ki ophis sorkar bad ki jaka ba long paidbah bad kiwei kiwei. “Kane ka sienjam ka dei kum ka lad jingïada ba la shim ban pynduna ïa ka jingma na ki jingpluh ding bad ka jingshngain jong ki paidbah,” ong ka kyrwoh.
Halor kane ka jingbthah, baroh ki jingtei la bthah ba kin aplai kloi kat kaba lah ïa ka Fire Clearance Certificate/Fire No Obection Certifcate (NoC) lyngba ka Online portal ka Sorkar ha ka investmeghalaya.gov.in lane leit ïakren sha ka Ophis u Superintendent of Police (Fire & Emergency Services) ban ïoh jingïarap.
Na ka District Disaster Management Authority ka kyrpad ïa baroh ki kynhun ba don bynta, ba kin ai ka jingïatreilang ba pura bad ki bor ba dei peit khnang ban pynthikna ïa ki kyndon jingshngain haba pluh ding bad ïada ïa ka jingim bad ki nongkynti ha ka Jylla.