Dei ban kyntait ïa ki seng saiñpyrthei kiba wanrah ïa ka jingïapher jaitbynriew: Conrad

Shillong, Rymphang 18: U National President ka National People’s Party (NPP) bad Myntri Rangbah Conrad K Sangma, ula kyntu ïa ki paidbah ka Ri-lum Khasi Jaiñtia ba kin kyntait war ïa ki seng saiñ pyrthei kiba pyrshang ban wanrah ïa ka jingsngew ïapher jaidbynriew ha ka elekshon KHADC bad JHADC, ka ban long la 21 tarik mynta u bnai.
U la ong, “Ka elekshon ban wan kan dei ka kabu ban ai ïa ka jubab kaba bha eh ïa kito ki seng saiñ pyrthei kiba pyrshang ban phiah bad wanrah ïa ka jingïapait ïapra ki briew jong ngi.”
Ïa kane u la ong haba kren ha ka rynsan ïalap elekshon ha Dangar kaba hap hapoh ka Mawsynram constituency.
“Ngi dei ban kyntait bad kynjat ïa ki seng saiñ pyrthei kiba pyrshang ban phiah ïa ki briew jong ngi,” ula ong da kaba bynrap, “Ngi hap ban ïeng pyrshah jur ïa ka saiñ pyrthei ba pynïapait ïapra bad nym ailad ïa ki seng saiñ pyrthei kiba pyrshang ban wanrah ïa ka jingïashun bad ïapait ïapra hapdeng ki briew jong ngi”.
Halor kane u Conrad ula ong ba ka jingthep vote ka dei ka hok ba la pynkup bor da ka riti synshar ka Ri ïa ki briew jong ka jylla bad ban jur ba kam don satia kano kano ka jingthmu ban nym shah ïa ki trai ri trai muluk ba kin leit thep vote lane pynduh ïa ki jaidbynriew riewlum ba rit paid ha ka elekshon KHADC bad JHADC.
Ha kawei pat ka liang ha ka jingleit ïalap elekshon ruh ha Cherrakata, Pataghat bad ha Mawsynram ban pan jingkyrshan ïa u kyrtong ka NPP Bah Alvin Sawkmie, u la pynkynmaw ïa ki jingkular ba la pynurlong hadien ka elekshon KHADC 2019, khamtam ha ki thaiñ khappud ka India-Bangladesh.
“Ngi la ithuh ïa ki jingeh ba la ïakynduh da ki briew jong ngi basah ha khappud bad ngi la wanrah ïa ki prokram ban pynthikna ïa ka roi ka san bad ban kiew ka bha ka miat jong ki paidbah,” u la ong.
“Ki paidbah ha khappud kila shah ieh beiñ la slem bha, hynrei ngi la pyndep ïa ki jingkular da ka jingtei ïa ka syrok Balat-Dangar-Ryngku, kaba la kular ha ka por ïalap elekshon KHADC 2019,” ula bynrap.
U Myntri Rangbah ula ban jur ruh ba ka Sorkar NPP ka ngeit skhem ha ka bha ka miat jong ki paidbah bad kala pynurlong ïa baroh ki jingkular. U la pyntip ha kane ka jingïalang ba ka project ba T.50 klur kan sa nang pynsuk ïa ki paidbah haba kdew ruh ïa ka surok Weiloi-Mawsynram ba T.100 klur, kaba la pyntrei mynta hapoh ka project ka World Bank.
“Ki Liang Pyrshah ki lah ban kren kat kaba ki mon hynrei kim pat ju shna ïa ka surok ne ka jingkieng hapoh ka thaiñ,” ula ong bad bynrap, “Ka NPP kala pynthikna ïa ka jingshna surok bad ka jingkieng ha Khasipara ka dei kaba dang pynwandur mynta bad shen yn sa pyndep noh ïa ka”.
Halor kane ula kyntu ïa ki paidbah ba kin ai biang ïa ka jingshaniah jong ki ha ka NPP kumba kila jied ïa ka Sorkar ha ka elekshon KHADC 2019, kaba pynkupbor ban wanrah ïa ka roi ka par.
Haba pynpaw ba ki jaka khappud ki donkam ïa u nongïalam uba lah ban treikam, u Conrad ula ong, “Nga la ïaid ïalap elekshon ha ki jaka khappud ha ka por elekshon bad ki paidbah kila ïatylli bad ka NPP. Ki la kut jingmut ban trei bad nang pynkhlaiñ ïa ka NPP ban nang lah pynroi ïa ka jylla Meghalaya”.