Dei ban khot ka Dorbar Kyrpang ban pyrshah ïa ka OM ba ailad ban tih ïa u Uranium: HYC

Shillong, Nailur 22: Ka seng Hynñiewtrep Youth Council (HYC) ka la dawa na ka Sorkar Jylla ban lum ïa ka Dorbar kyrpang (Special session) jong ka Ïingdorbar thaw aiñ ka jylla ban mynjur noh da ka Resolution ha ka ban pyrshah ïa ka Office Memorandum kaba la pynmih da ka Ministry of Environment, Forest and Climate Change’s (MoEFCC) bad ban pynkut noh ïa kano kano ka jingtyrwa ban tih ïa u Uranium hapoh ka jylla Meghalaya.
Ha ka shithi kaba la phah sha u Myntri Rangbah ka Jylla u Conrad K Sangma ha ka Sngi Nyngkong, ka HYC ka la ong, “Kumta ngi kyntu ïa u Myntri Rangbah ka jylla ban shim ïa ki lad ki lynti bad ïa ki sienjam kiba mardor ban lum ïa ka ‘Special Session’ jong ka Ïingdorbar thaw aiñ ka jylla ban mynjur ïa ka Resolution ban pyrshah jur ïa ka “Office Memorandum kaba 8 tarik u Nailur, 2025 kaba la pynmih da ka MoEFCC, Impact Assessment Division, ka Sorkar India hapoh jong ka phang ban pynkloi ïa ki kam ki jam jong ki projek kiba ïadei bad ka jingtih ïa ki marpoh khyndew kiba kongsan Critical, Strategic bad Atomic Minerals-reg. ha kaba ïadei bad ka jylla ka jong ngi bad ban pynpaw sha ka sorkar India ban pynkut noh ïa kino kino ki prokram ne ki jingtyrwa ban tih Uranium hapoh ka jylla Meghalaya.”
Ha kaba ïadei bad kane katkum ka katei ka Memorandum la pyllait na ka jingdonkam ban ïasyllok bad ki paidbah ne Public Hearing na ka bynta ki projek kiba ïadei ban tih ïa ki marpoh khyndew kiba kynthup hapoh ka Atomic Minerals kum u uranium, kaba long ka bynta kaba kongsan jong ka Environmental Impact Assessment (EIA).
Halor kane ka HYC ka la ong ba ka jingïasyllok bad ki paidbah bad ka jingsngap ïa ka jingpynsngew ki paidbah ka long kaba kongsan bha ban pynthikna ïa ka khuid ka suba ha ka ban shim ïa ka rai kiba ktah ïa ki trai ri trai muluk.
Ka HYC ka la kyntu ba ki projek tih marpoh khyndew khlem ka jingïasyllok bad ki paidbah kan buh ha ka jingma kaba khraw ïa ka jingim bad ïa ki pateng jong ki jaidbynriew bapher ha Meghalaya.
Nalor kane, ka la kdew ruh ba ka jingpyllait na ka jingpyntreikam, ka long ruh kum ka jingñiewpoh ïa ki rynsan paidbah bad kiba don bynta ha ka kam ban pynsngew ïa ka jingsngewkhia ka jong ki bad ban ai ïa ki jingtip, ban ai lad ïa ka imlang sahlang ban ïoh ïa ki jingtip kiba kongsan shaphang ka jingshah ktah ka mariang bad ki paidbah. Halor kane ka HYC ka la pynbna ïa ka rai ban pynlong ïa ki jingïalang paidbah ha West Khasi Hills, South West Khasi Hills district bad ha Shillong ban pynshai shaphang katei ka Office Memorandum bad ban pan ïa ka jingkyrshan ban kyntait ïa ka jingtih ïa u Uranium ha ka rilum Khasi-Jaiñtia.