Nongstoiñ, Jymmang, 11: Ka jingshna jong ka PWD ïa ki Speed Breaker ha Jeidohkroh ka la ïarap haduh katta katta ïa ki kali ba kin lait na ka jingaksiden bad naduh ba la shna ïa kitei ki Speed Breaker ym ju don shuh ki kali kiba aksiden ha katei ka jaka kumba ka ju jia khah khah ha ka por bym pat shna ïa ki.
Watla ka jingaksiden kam ju kham jia shuh hynrei kitei ki Speed Breaker ki ktah haduh katta katta ïa ki kali khamtam ïa ki kali heh kiba mih na Nongstoiñ bad kiba kit khia. La ju lap borabor ba ki kali heh kiba kit khia khamtam ki trok 12 shaka ki sniew noh haba la poi ha kitei ki Speed Breaker.
Haba ïakren bad ki nongñiah ïa ki kali rit ki trok heh bad ki bus ki la ong ba kim sngew eiei ïa ka jingshna ïa kitei ki Speed Breaker hynrei ka PWD ka la dei ban shna ha ka rukom kaba dei kata ban kham pynïajngai uwei na uwei pat bad ban pynduna khyndiat ïa ka jingkynjang khnang ba kan ym ktah than ïa ki kali.
Ki nongñah trok ki la ong ruh ba ha kiwei kiwei ki surok bah kiba dei ki surok National Highway ka rukom buh ïa ki Speed Breaker ka ïapher bak lybak na kitei kiba la shna ha Jeidohkroh bad kam da ktah eh haduh katta katta ïa ka kali.
Kumta ki la kyntu ïa ka tnat PWD Nongstoiñ Divission ba kan peit bniah bad shna ha kawei pat ka rukom khnang ki nongñaih kali ruh kin ym shitom than.
