Shillong, Risaw 09: Ka seng saiñ pyrthei kaba don ha ka liang pyrshah ka Voice of the People Party (VPP) ka la dawa ïa ki pulit ka jylla ban kem mardor ïa ki runar kiba donkti ban pynïap ïa u khynnah uba dang 7 snem ka rta u heprit Kyrshanbor Kharmudai.
Ka party ka la khot ruh ïa ki bor pynïaid ban pynlong ïa ka jingtohkit kaba bniah halor ka jingjia ba shah pynïap kaba dangshen ruh kaba la jia ha shnong Nongrah, khnang ba ka jingshisha kan paw bad kumjuh ruh ban ai ka jingbishar kaba hok ïa ki lanot bad kumjuh ruh ban pynshitom da kaba tyngeh ïa ki runar kiba donkti.
“Ka Voice of the People Party ka pynrem jur ïa kane ka jingjia shah pynïap, kaba la pynlehraiñ, khamtam kaba la jia ïa u heprit khunswet u Kyrshanbor Kharmudai. Ka Party ka kyntu ïa ka tnat ki Kam Pohïing ka sorkar jylla ba kan tohkit bha ïa kane ka jingjia bad ba kan thwet jur ïa ki nongpynïap haduh ba kin da lap bad ba ki dei ban ai ka jingpynshitom kaba tyngeh ïa ki runar kiba leh ïa kane ka kam,” ong u Nongaiktien ka VPP u Bah Batskhem Myrboh ha ka kyrwoh khubor kaba la phah ha ka sngi Palei.
U la pynpaw ruh ka jingsngewsih ba kane ka jingjia shah pynïap ka la hap ban ïai jia na ka daw jong ka jingbym lah jong ka tnat pulit ban shimkhia ïa kane ka jingjia.
“Ka tnat ka khlem shim shisha ka jingkitkhlieh kaba biang ban pynthikna ïa ka jingshngaiñ bad ki lad jingïada ïa ki nongshong shnong, kyrpang ïa ki khynnah, da kaba kem ïa kiba la kynnoh ba ki dei kiba rahbor na ki bynta bapher bapher jong ka nongbah Shillong bad ki thaiñ ba marjan,” ong u Bah Myrboh ha kajuh ka por u la kyntu ïa ka tnat ba kan ngam jylliew bha ha ka jingtohkit jong ka halor ka jingshah shah pynïap ruh jong kawei ka heprit kaba la jia hi ha ka shnong Nongrah khnang ban lah sei madan ïa baroh ka jingshisha bad ban pynshitom da kaba tyngeh ïa ki runar kiba leh ïa kane ka kam.”
Haba ong ba kadei ka kamram jong ka sorkar ban pynthikna ïa ki lad jingïada jong ki nongshong shnong, u nongïalam ka VPP u la banjur da kaba pynpaw ba ka jingïai pulom jong ka sorkar ha ki por kiba la leit ka lah ban lam sha ka jinglong jingman ha kaba ki nongshong shnong kiba bat ïa ka aiñ ki lah ban shim ka rai ban shim noh ïa ka aiñ ha la ki kti la jong, kaba jinglong jingman kaba hap ruh ban pynlong ïa ka sorkar ba kan shim ïa baroh ki sienjam ban ïada bad khanglad ïa kane ka jingthmu.
“Ka sorkar ka dei ban sngewthuh ïa ki jingmih kiba heh khamtam haba ïadei bad ka jinglah jong ki ban pynthikna ki lad ai jingïada ïa ki jingim jong ki briew,” pynkut u Nongaiktien ka VPP.
