Mawthadraishan, Naitung 18: Ka UHM West Khasi Hills lyngba ka Mawthadraishan circle Eastern West Khasi Hills, katkum ka kyrwoh na u Samla Bishar Rekon Thabah General Secretary ka UHM West Khasi Hills, u ba dei peit ruh ïa ka Mawthadraishan Circle, ka la pynrem jur ïa ka kmie bad kpa jong iwei i khunlung ba dang shu kha, kiba la wan bret ïa ine i khunlung ba dang lui lui hapoh u pud shnong Umkrem-Wahliewlong, kaba hap ha ka Mawthadraishan, ha ka 15 tarik u bnai Naitung, ha kaba la lap da u wei u nongñiah kali na thaiñ Marngor ha ka por 8 baje eiei mynmiet.
“Ka seng ka pynrem jur ïa kine ba leh ïa kane ka kam, ba kiba wan bret ïa ine i khunlung bad ki dei kiba don palat ban ïa ka mynsiem ksuid. Ki lah don da ka mynsiem aiu re aiu namar ki ksuid ki dang don hi tharai ka mynsiem pyrkhat ne sngew lem para ksuid. Hynrei kine te kim shym la don shuh ïa kata ka mynsiem isynei ne sngewlem ïa la i khun ba kha. Ban ïa ong ka mynsiem briew ka ban tip lem ne isynei lei te ka la eh, namar ba ki la nud ban bret ïa la i khun kiba la pun hi dalade”.
“Ka dei ka doh ka snam jong ki hi bad ka dei ka kam ba ki la leh, hynrei ki dang nud ban dang leit bret kaba long kumba pynïap ïa i bapli. Hynrei kiba dang hok dang lui lui u Blei u tip bad ïohi. Kane kan dei ruh ka sien nyngkong ka ban jia hapoh ka thaiñ, kaba la pynher syrngiew bad pynsuh jer hi ïa ka shnong ka thaiñ hi baroh kawei”.
“Ka seng ka la kyrpad jur ïa ka child line bad ïa ki bor jong ka aiñ, ba kin thwet jur ïa ka kmie bad u kpa kiba la nud ban wan bret ïa ine i khunlung bad ka child line ka dei ban ai da ka jingpynsaja kaba tyngeh khlem da shah shilliang lada dei mano mano ruh, khnang ba kum kine ki jingjia kin ym jia shuh hapoh ka bri u Hynñiewtrep”.
“Ka seng ka kyrmen lyngba ka jingtrei shitom ki briew jong ka Aiñ, kin lap noh shen ïa ki kmie ki kpa jong ine i khunlung. Ka Seng ka maham ruh ba kum kine ki jingjia kim dei shuh ban jia hapoh ka thaiñ bad hapoh ka Bri U Hynñiew Trep bad lada ka dang jia bad lada ka seng ka lap ïa kum kita ki briew, kan leh ïa kaba donkam khlem jingmap, namar kane ka kam ka kham palat wat ïa ki Nongpynïap briew, namar ki khunlung ba dang lui lui bapli kim pat tip kaei kaei ruh. Ka Seng ka kyntu ïa ki paradoh para snam ba kin pyrkhat arsien shwa ba kin leh ïa kino kino ki kam, namar bunsien ka jingbam ja khluit ka poi sha ka jingjot bad kiar na ka shongkha khynnah”.
“Ka seng ka la ai khublei ruh ïa u nonglap ïa ne i khunlung wat ha ka jingdum ka miet ruh khlem jingsheptieng, u la len lade ban leit shim ïa ine i khunlung hadien ba i la lap. Ka seng ka ai ka jing kitbok kit rwiang ïa i nonglap ba in dang ïoh ka met kaba koit kaba khiah bad in dang bha kamai kajih. Kumjuh ruh i dang lah ban ïai bteng ban leh ïa ki kam ba bha bad sngew synei hapoh la ka dong ka thaiñ baroh kawei”.
“Ka seng ka ai ka jingkitbok ruh ïa ine i khunlung ba dang lui lui, ba in dang ïai heh ïai san ïai plung ryngkat ka jingtip briew tip Blei bad kumjuh ïa ki nongshimti ban sumar ïa ine i khunlung, ba kin lah ban pynheh pynsan ïa i ryngkat ka burom ka akor ba in kit ha ka longrynieng jong I”, ong ka kyrwoh na ka seng UHM.