Dei ban ithuh ïa ka Tura kum ka nongbah ka Dorbar Tlang ka jylla, dawa ka AHICK na u Lat ka jylla

Shillong, Jylliew 02: Ka seng A-Chik Conscious Holistically Integrated Krima (ACHIK) ka la leit ban ïa kynduh ïa u Lat ka jylla ha Raj Bhawan Shillong ha kaba ki la ai ïa ka dorkhas kaba kynthup ïa shibun ki jingdawa. Hadien ka jingïakynduh bad u Lat ka jylla u C.H Vijayashankar ki nongïalam ka seng haba kren ha ki lad pathai khubor ha Shillong Press Club, u president ka ACHIK u Macklawrence M. Sangma u la ïathuh ba ha kane ka jingïakynduh ki la ai ïa ka dorkhas kaba kynthup ïa ki hynriew tylli ki mat jingdawa.
Ka mat kaba kongsan eh kaba la buh ka long ban ithuh noh ïa ka Tura ba kan don ïa ka jingïashong dorbar tlang jong ka ïing dorbar thaw aiñ ka jylla, kan don ka ophis treikam ha kaba baroh ki tnad sorkar ki dei ban don bad ka ïing bishar.
Ha kaba ïadei bad kane, kawei pat ka mat kaba kongsan napdeng kiba bun ki jingdawa, ka seng ka la ban jur ïa u Lat ka jylla ban pyntreikam ïa ka Inner Line Permit (ILP), ka daw ka long ban khang lad ïa ka jingwan rung kyrthep ki khar Bangladesh sha Garo Hills bad kane ka ktah ïa ka jaidbynriew Garo kiba rit paid.Ka seng ACHIK ka la thoh shai kdar ha ka dorkhas ba ka jingwan buhai shnong ki briew na Bangladesh ym ba ka ktah tang ïa ka shongsuk shongsaiñ hynrei ka buh jingma ruh ïa ka ri hi baroh kawei bad ki la don ki khep ba ka la don ka jingïakynad jaidbynriew.
Kiwei pat ki mat kaba ki la buh hakhmat jong u Lat ka dei ban ithuh noh ïa ka Garo Customary Law, ban don noh ïa ka Electoral Roll la ka jong na ka bynta ka election GHADC ban sdang noh ïa ka skul bah Williamson Sangma State University, ban pyntreikam noh ïa ka kad liengsuiñ Baljek Airport bad ban kyntiew noh ïa ka Dadenggre Civil Sub Division sha ka District.