Dei ban ïaburom mar kylliang kum ki nongmihkhmat paidbah : Prestone

Shillong, Naitung 11 : Wat la u Symbud Myntri Rangbah ka jylla u bah Prestone Tynsong u dei u myntri ba peit ïa ka tnad Parliamentary Affairs, hynrei u la ong ba um lah ban ong ei ei halor ka jingjia ha Umiam Lake Resort ha ka 6 tarik ba u bah Sanbor u ïeng ban pynthut ïa ka jingkren u Lamphang ka ïing dorbar bad President ka UDP u bah Metbah Lyngdoh namar kane ka jia sha bar na ka ïing dorbar bad sa kawei ka dei ka jingïalang ba la khot da ka BJP na ka bynta ka kyrtong President jongka sorkar NDA.
“ Kaei kaba nga lah ban ong ka long tang kane ba kum ki nongmih khmat paidbah ngi la dei ban ïa burom mar kylliang naduh ïing dorbar haduh habar ne ha kino kino ki rynsan. Haba uwei u nongmih khmat u dang kren ym dei ban pynwit ne pynthut dei ban ailad ba un kren. Lada kiwei ki kren ngam dei ban pynthut bad lada nga kren ruh ym dei ban don ba pynwit ne pynthut ïa nga khamtam ha ki rynsan paidbah” ong u bah Prestone.
Halor ka jingsdang ki jingïakawang ktieh mar kylliang ki MLA ka BJP kata hapdeng u bah A.L Hek bad u bah Sanbor Shullai wat la ki dei kiba don hapoh ka sorkar MDA hynrei u Symbud Myntri Rangbah u la ong “ Kaba bha tam ka long ba ki dei ban ïa pynbeit noh ïa kane ka kam para ma ki ne hapoh ka party BJP la ka dei ha Executive Committee jongki ne hangno hano ruh.
Ha ka 8 tarik u bah Sanbor Shullai ula pan map halor ka jingleh bakla jongu ha ka por ba kren u bah Metbah Lyngdoh ha ka jingwan pan jingkyrshan jongka kyrtong ka NDA ka Draupadi Murmu da kaba u la ong ba ka dei ka jingpynheh ïa kaei kaba la jia. Ha kajuh ka por u la dawa ruh ban leh ei ei ne sospon shipor ïa u bah Hek na ka BJP namar u kynnoh ba u la ïalam bakla bad shim kabu na kane ka jingjia kaba jia hapoh ïing hynrei la thad madan noh ïa ka.
Na ka liang u Myntri Rangbah ruh ula kular ba un leh ei ei halor kane ka jingleh bad jingpynthut u bah Sanbor ha ka por ba dang kren u Lamphang uba long ruh u President ka UDP u bah Metbah Lyngdoh ïa kaba la sakhi lang ruh da u Myntri Rangbah ha katei ka 6 tarik ha Orchid Lake Resort. Katba u bah Metbah Lyngdoh u dang kren da kaba sngewkhia halor ka jingshah thombor jong ki riewlum rit paid ha kylleng ka ri India hakhmat ka Murmu namar ka dei ka riewlum bad ba kan shim khia ynda ka la kiew ha ka khet President u bah Sanbor u la ïeng joit bad pynwit ïa ka jingkren da kaba u la ong ba kam don kata ka jingthombor ha India.