Shillong, Ïaiong 06 : U President ka HSPDP, Bah KP Pangniang ha ka sngi Balang u la ong ba ka sorkar jylla kadei ban phah dro biang da kawei ka map Meghalaya khnang ba ki jaka ba dang kajia pud kin donlang ha katei ka map.
Haba kren bad ki lad pathai khubor, u Bah Pangniang u la ong katei ka jingdawa jong u, kadei hadien ba la mih ka jingkynnoh ba kum u President u la ai ka jingtip kaba bakla halor kitei ki jaka kajia pud ba kim paw shuh ha ka Map Meghalaya.
“Ka jingong ba ki 12 tylli ki jaka kajia kim hap ha Meghalaya kam dei satia kaba ong manga hynrei kadei katkum ki Map jong ka Meghalaya. Ngi don ar tylli ki map Meghalaya, kawei ka map ka don lut ïa kitei ki jaka ba kajia pud bad kawei pat ka map kaba don ha baroh ki jaka treikam jong ki sorkar kam kynthup satia ïa ki jaka kajia pud,” la bynrap shuh shuh utei u nongïalam ka HSPDP.
Nalorkata u ong ruh ba u kwah ban pynshai ba katkum ki ‘official map’ lah ban ïohi ha ki jaka treikam jong ka sorkar lane ha ka google map ba kitei ki jaka kajia pud kim don shuh ha ka map. “Kumta na ka liang ka HSPDP ha ka jingïaid lynti mynta la palat 45 snem ngi la ïai dawa ban pynbeit noh ïa u pud u sam bad ïa kane ngi pynsngew na ka por sha ka por. Kumta kadei kaba ym don nongrim satia ban ïohi ha ki lad pathai khubor ba u Bah Pangniang u ong ba ki 12 tylli ki jaka kajia pud kim don shuh ha Meghalaya.”
Shwa kane da kaba pyni artad ïa ka map jong ka Meghalaya, u Bah Pangniang u la ong ba ha u snem 2010 ba u dang long kum u MDC, na ka party ki la rah bad pyrshah teng ïa katei ka map ha ka jingïalang kaba long ha Nongstoiñ. Ym tang katta u la ong ruh ba ha katei ka por ki la tar ruh ïa katei ka map ryngkat ka jingdawa ba dei ban pynbeit noh mardor.
