Dei ban don beit kawei ka CCTV ha gate ban ïoh ring dur ïa ki runar, Kyntu u SP ïa ki paidbah

Shillong, Risaw 13 : U Superintendent of Police jong ka East Khasi Hills, Bah Vivek Syiem u la kyntu ïa ki paidbah ba donkam ban buh CCTV ha ki khyrdop (gate) ym ha phyllaw ne kut iing namar da kaba leh kumtei yn lah ban ring dur ïa ki runar kiba thmu ban rung shapoh iing ban leh ïa kino kino ki kam pyntriem.
Haba kren bad ki lad pathai khubor, u ne u heh pulit u la ong ruh watla ka long kaba donkam ban don ïa ki CCTV hapoh phyllaw ne wat ha kut iing hynrei kaba kham kongsan hi ka long ban don kawei ha khyrdop khnang ba kan lah ban ring dur lada don kino kino ki jingjia ne ïa ki runar kiba don ka jingthmu ban wan leh ïa ki kam runar ne kam bymman.
Shuh shuh u la ïathuh ba mynta ki la bthah ba man ki jaka sah paidbah kum ki hotel, ki guest house bad kiwei kiwei ba ki dei ban leh ïa kane na ka bynta ka jingshngain jong baroh.
“Ki don bun ki jingjia kumba la dep shen ba watla ki CCTV ki don hynrei kim treikam. Don ruh ki khep ba watla ki don hynrei kim phai pat sha ka jaka kaba donkam. Kum kine ki buh jingeh bha wat ïangi ruh,” u la bynrap biang.
U ong ruh ba ka jingdon jong kine ki kor ring dur ym tang ba ka pynsyier ïa ki runar ban leh ïa ki kam pyntriem hynrei ka ïarap ruh ïa ki pulit ban suk thwet ne lapdien ïa ki runar ba donkti ha ki kam runar bapher bapher.
U SP u la ai nuksa ruh ba kum ka jingjia ha Umpling na ka jingdon ki CCTV jong ki BSF ka la ïarap ïa ki pulit ban buddien ryngkat ryngkat ka jingïatrei lang bad ki bor shnong ha kaba tang khyndiat por ki la ïoh ban thwet bad lap ïa ka khynnah.