Dei ban buh biang ïa ka weight bridge ban ïoh talasi ïa ki trok kit palat pud : HNYF

Shillong, Naiwieng 04: Ka Hynñiewtrep National Youth Front (HNYF) Southern Border Area ka la dawa ban buh biang ïa ka weight bridge kaba long kaba donkam ban talasi ïa ki trok kiba kit palat pud hapoh ka jingkieng Umpung.
Ha ka shithi ba la aiti sha ka deputy commissioner jong ka East Khasi Hills District ha ka sngi baar, u president ka seng u Bah K Thongni u la maham ba ka seng kan leh ïa kaba donkam pyrshah ïa ki trok kiba kit palat pud.
Katkum ka jingong jong u, kane ka jingkieng ka lah ban shan tang ïa ka jingkhia kaba long 9 ton, hynrei ki trok pat la shem ba ki la kit palat pud bad wanrah ka jingjulor ïa ka jingkieng.
La ong ba na ka liang Executive Engineer, Mawsynram Division PWD (Roads), la pynmih ka jingpynbna da kaba wah ïa ka signboard kaba pyni ïa ka jingkit khia kaba lah ban ïaid na kane ka jingkieng.
Kane ka jingkieng kaba la don mynta la kumba 60 snem kaba la tei ruh ha ka por jong ka sorkar Assam, mynta ka la sdang ban sniew bad kane kam dei tang ha Umpung kaba ha East Khasi Hills district bad kumjuh ruh ha South West Khasi Hills district.