Dei ban bhah lem 5% ïa ki khun ki nongtrei bylla sngi, kyntu ka AJMRWLU ïa ka sorkar

Shillong Naitung 15: Ka seng jong ka All Jaiñtia Muster Roll Workers & Labour Union (AJMRWLU) ha ka sngi Nyngkong ka la kyntu ia ka sorkar jylla ba ka dei ban bhah 5% na ka bynta ki khun jong ki nongtrei bylla sngi ha ki jaka pule bad ban ïohkam ïohjam sorkar ne ha ki kam shimet.
Lyngba ka dorkhas kaba ki la phah sha ka Expert Committee on Reservation Policy, ka President ka AJMRWLU Daioowanphi Iakai ka la ong, “Kadei kaba la tip lut da baroh ba ki khun jong ki nongbylla sngi (muster roll) ki don ha ki tnat sorkar bapher bapher lane kiwei pat kiba duk ha ki kam shna jingshna, bylla ha ki ïing briew bad ki nongrep ki mad ïa ki jingeh kiba khraw ha ka ban ïoh ïa ka jingpule ha ki kyrdan kiba heh ne ban ïoh ïa ka kam sorkar kaba biang hapoh ka jylla. Kiba bun hi na ngi kidei kiba duna ha ka ïoh ka kot ban kyrshan ïa la ki khun ha ka jingpule bad ha ka jingangnud ka jong ki”.
“Halor katei ka bynta, ngi na ka liang jong ka AJMRWLU ngi kyntu jur ban ai 5% ïa ka bhah na ka bynta ki khun jong ki nongtrei bylla sngi ha ki jingpule bad ha ka ban ïohkam ha ki tnat sorkar ne ha ki kam riewshimet ha kylleng ka jylla Meghalaya. Kane ka jingthmu ka long ban weng ïa ki mawjynthud kaba ïakynduh da ki khynnah pule bad ki samla ki jong ngi, da kaba ai pat ïa ki ïa ka lad ba kin ïoh ïa ka bhah pule bad ïa ka lad ban ïohkam ban tei ïa ka lawei ka jong ki,” ka la ong.
Ka Kong Iakai ka la ong, ba da kaba bhah kyrpang kumtei ym tang ba kan kyntiew ïa ka hok hynrei kan ïarap ruh ha kaban noh synniang ïa ka roi ka san ha ka jylla baroh kawei da kaba pynkupbor ïa kiba duna ha ka ïoh ka kot bad ban kyntiew ïa ka roi ka san ha baroh ki liang ka ban ïaid bad ka nongrim jong ka jingbym shah liang bad jingkhuid jingsuba, ban pynthikna ba man la ki khynnah kiba stad kin ïohlang ïa ka lad ban bteng ïa ka jingpule ka jong ki ha ki kyrdan kiba heh bad ban don ïa ka jingangnud ban long kiba tbit.
“Ngi kyntu ïa ki dkhot jong ka expert committee ba kin pdiang lem ïa kane ka jingkyrpad bad ban shim ïa ki sienjam da kaba pynrung lang ïa katei ka jingbhah kyrpang ha ka jingpynbeit thymmai ka jongki ïa ka Meghalaya State Reservation Policy,” ka la pynpaw ha ka dorkhas bad ka bynrap, “Da kaba leh kumtei, ngi lah ban ïatreilang na ka bynta ban thaw ïa ka imlang sahlang kaba ïaid shaphrang da baroh lang ha kaba wat kito kiba wan na ki longïing kiba duna ha ka ïoh ka kot kin ïoh lem ïa ka lad ban pynurlong kum kita ki longbriew manbriew kiba pura”.