Shillong, Iaiong 28 : Ka jingtuid ka um shapoh ki kamra hostel shynrang bad kynthei jong ka skulbah National Institute of Technology (NIT) ha kine ki khyndiat sngi kam dei satia ka jingtrei torti jongka kompani ïa ki jingtei hynrei dei namar ba wan kynsan u slap uba jur bad ka lyer ba sa tuid ka um shapoh ki kamra hynrei tang shu rang u slap ki nongtrei ki la pynkhuid noh mar mar hi ïa ka um.
Haba ïakren bad u Director jongka NIT u Pinakeshwar Mahanta, u la iathuh “Kane ka jingjia ka jia namar ba wan syndet u slap ba jur bad ka lyer ba ka um ka sa ïoh ban tuid sha ki kamra namar ka jingtrei ruh ka dang ïaid artat hapoh phyllaw jongka NIT Sohra. Hynrei tang shu la rang u slap ki nongtrei ki la trei wut wut ban pynkhuid bad pynbiang ïa ki jingdonkam jongki samla pule kumta ha kato hi ka sngi ki la ïoh ban sah ha ki kamra jongki. Kam dei ka jingtrei torti jongka kompani hynrei ka jia ryngkhat ba ka jingtrei ruh ka dang ïaid kumta dang hap hi ban mad bad ïa kynduh ïa ki jingeh”. “Nga kyrmen skhem ba tang shu la dep tei nadong shadong kan ym don jingthut shuh ïa ki samla pule namar la khmih lynti hapoh u Naitung lane u Nailar yn lah ban pyndep ia ka jingtei ïa ka NIT. Hynrei ïa mynta ba ka jingtrei ruh ka dang ïaid nga kyntu ïa ki samla pule ruh ban long kiba ïai shah lem bad ki bor pynïaid. Hooid kiba bun ki jingtei ki la dep bad la pyntreikam ïaki naduh u Rymphang 2025 hynrei wat la katta ruh ki dang don hi ki jingduna hangne hangtai kiba dang sahteng bad ym pat lah ban pyndep lut bad da kine ki jingjia la nang lap bad la nang ïoh ban pynbha ïa ki” ong u Director.
