Dei ba shimti ka skul Katholik ba poi u (L) P A Sangma sha ka shuki Lamphang ka ri: Conrad

Shillong, Rymphang 11: U Myntri Rangbah ka jylla u Conrad K Sangma ha ka sngi Balang u la plie ïa ka skul kaba la ai kyrteng Bishop Mama Memorial School (BMMS) ha Saltopgre ha ka jingdonlang u Rt. Bishop Rev. Andrew R. Marak, bad u Rt. Bishop Rev. Jose Chirackal bad ki khynnah skul bad ki riew paidbah na kane ka shnong.
Haba kren kum u kongsan u Myntri Rangbah ka jylla u la ong ba ka jingpynkylla kaba ka jingnang jingstad ka ai ka long ban wanrah ïa ka jingkylla ha ki briew shimet shimet bad ha ka imlang sahlang, u ai ka jingïaroh ïa ka balang bad ïa ki bor pynïaid jong kane ka skul bad ki la ïa treilang ban seng ïa ka skul bad ha ka juh ka por ka sorkar ka dang pynkhlaiñ shuh shuh ïa ki jaka pule ha ka jylla.
U Myntri Rangbah ka jylla u la ong ba ka jingkyntiew ïa ka pule puthi kam dei tang ki nonghikai marwei hynrei ka dei ka kamram ruh jong baroh, naduh ki paidbah ha ka imlang sahlang bad ki kmie ki kpa ruh kumjuh donkam ban ïatreilang.
U la pynkynmaw ba u kpa jong u, u (L) Purno A Sangma la shimti da ki Katholik Missioneri na ka shnong kaba rit bha ka Chapahati bad kila pynnang pynstad ïa u bad lyngba ka jingstad ka la pynkylla ïa ka lawei ka jong u bad dei na ka jingstad kaba u don haduh ban shah jied kum u Lamphang ka Dorbar Thaw Aiñ ka ri ka Lok Sabha.
U la ong ba u P A Sangma u dei u briew ba ieid bha ïa ka jingstad, la ong ba ma ruh u long kumba long lem kiwei ki khynnah jaituh ban leit sha skul, dei na kane ba donkam ïa ka jingkyrshan bad btin lynti ïa ki khynnah ha ki snem kaba ki dang dei ban khi ban san.
Ka jingplie ïa kane ka skul ka Bishop Mama Memorial School kan long kawei pat ka jingkyrkhu ha ka pule puthi ha ka shnong Saltopgre kumta la khmih lynti ba kan noh synniang ha ka pule puthi ha ka thaiñ, ha kane ka sngi ïa ka jingkyrkhu la pyndep da u Rt. Rev. Andrew R. Marak bad Rt. Rev. Jose Chirackal ban pan ïa ka jingkyrkhu ïa ka skul bad ki samla pule.