Shillong, Jylliew 01 : Ka jingbym ïohlad ki Khasi ban shimti ïa ka shuki Vice Chancellor ha skulbah North Eastern Hills University (NEHU) ka dei eh namar ka sur ban kyrshan ïa ka jingdawa ka tlot bha ynda la poi ha nongbah Delhi, ong u Dr. WR Kharlukhi, MP Rajya Sabha.
“Ha une u snem ban wan 50 snem kan dap ka skulbah NEHU hynrei ngi dang ïoh tang uwei u Khasi ban long u Vice Chancellor kata, u Prof Pakem. Ngi don ki briew kiba la biang pura ban shimti ïa katei ka kam hynrei ha Delhi kam sngap ïangi namar ngi leit tang marwei na Meghalaya,” ong u Dr. WR Kharlukhi haba kren bad ki lad pathai khubor.
Utei u rangbah uba bat ruh kum u President jong ka NPP Meghalaya u la ong ruh ba kumba thmu ka NPP ban phah 15 – 16ngut ki MP na ka thaiñ shatei lam-mihngi jong ka Ri da kawei ka sur kawei ka jingdawa ki lah ban leit sha Delhi ban dawa bad khlem artatien ka jingdawa kan urlong.
“Hynrei lada ngi leit la ka jongka jong ka jingdawa watla ngi dei na kajuh ka thaiñ ngi hap ban leit kyrpad bad haduh mynta ngi dang hap leh kumta,” u la bynrap biang.
Kumta, na ka liang jong u, u la ong ba ka por ka la dei ba ki nongshong shnong ka thaiñ shatei lam-mihngi jong ka Ri ban kyndit bynriew, bad ban ym don shuh ka jingïashun ïa shrut para , hynrei ban tylli lang bad ban dawa da kawei ka sur na ka Delh.
Shwa kane, u Dr. Kharlukhi u la ïathuh ruh ba kum u MP jong ka Rajya Sabha u la dep ruh ban kren ha Iing Dorbar na ka bynta ban pynrung ïa ka Ktien Khasi bad Garo ha ka Khyrnit kaba Phra. U ong ruh ba u nud ban kob ba dei tang ka sorkar jong ki kaba nud wat ban shim ïa ka rai kaba tyngeh halor ka Inner Line Permit bad ruh ban pyrshah ïa ka CAA ha kito ki por.
