Dei ba ki thmu wanrah Casino kim treh pyndam ïa ka Meghalaya Gaming Act, 2021: Robertjune

Shillong, Nailur 28: U President jong ka HYC seng kmie u Samla Robertjune Kharjahrin ha ka sngi Ba-ar u la ong ba ka jingbym treh jong ka sorkar ban pyndam ïa ka Meghalaya Regulation of Gaming Act, 2021 ka dei namar ba u Myntri Rangbah u Conrad Sangma bad u Myntri ka tnat Revenue u James Sangma ka dei namar ki la pynap lupa ban plie ïa ka Casino ha kylleng ki bynta jong ka jylla lada ki wan biang ha ka bor hadien ka ilekshon 2023 namar kumba long mynta ka jingkam ba la weng ïa ka jingthmu buh casino ka dei tang ha ka ktien ym ha ka kot.
Haba kren bad u Mawphor u Bah Robert u la ong ba na ki dak ki shin kiba paw la lah ban sngewthuh ba ka jingbym pyndam ka sorkar ïa ka aiñ Meghalaya Regulation of Gaming Act, 2021 ka dei namar ki la pynap lupa kliaw ban ïoh wanrah ïa ka Casino ha ka jylla lada ka NPP ka dang wan phai ha ka bor khang ba kan long ruh ka lad kamai spah da ki bad ki katto katne ngut da ki lynti kibym dei.
Na ka liang jong u u la ong ruh ba ka jingaidaw ka sorkar ba ka jingbym treh pyndam ïa kane ka aiñ namar ka jingmut hi ka long ban tehlakam ïa ki kam khalai u Bah Robert u la ong ba dei tang ka jingda rapjot suda jong ka sorkar namar ha ka jingshisha ka la don ka aiñ The Meghalaya Prevention of Gambling Act, 1970 kaba don ruh ka bniat ban teh lakam ïa ki kam khalai baroh.
U la ong ruh ba ka jingong u Myntri Rangbah ban ym shah ïa ki trai jylla ban leit sha kine ki ktem khalai u Bah Robert u la ong ka dei tang ka jingïalam bakla suda namar ha ka aiñ la shuh thoh beit ba ki nongpynïaid jong kine ki ktem khalai kin shu thoh ha ki khyrdop ba ïa ki trai jylla ym shah shim bynta hynrei ym don pat kino kino ki bor ban peit ba kin bud ïa kane ka kyndon.
Haba ïadei bad ka jingong ka sorkar ba da kane ka jingwanrah ïa ka khajna sha ka jylla lyngba kine ki kam khalai u Bah robert u la ong ba na ka liang ka sorkar ka jied pynban ïa ka jingjot ki samla ka jylla tang ban rah khajana da kaba ong ruh ba ha ka jingshisha kane ka daw ba ai ka sorkar ruh ka dei tang ki nia ai daw namar u ong tang khyndiat eh ka khajna kaban ïoh da ka jylla namar kiba bun ki khajna kin lait tuh.
U Bah Robert u la ong, “Kat kum ka The Meghalaya Prevention of Gambling Act, 1970 ka ong shai ba ym bit ban ïa khalai hynrei ka sorkar mynta pat ka ong bit ban ïa khalai khnang ban ïoh khajna kaba mut baroh ki kam sniew ka sorkar kan kyrshan ha ka kyrteng ka jingïoh khajna. Shuh shuh ngi ïohi ba la ong ruh ba ka jingwanrah ka sorkar ïa kane ka aiñ khalai mynta ka dei amar ban teh lakam ïa ki kam khalai kiba la don lupa hato kaba mut ba namar ba la bun ki kam thombor ïa ki kynthei ki khynnah yn pynlong aiñ noh ne hato namar la bun ki kam pynïap briew ka sorkar kan wanrah noh da ka aiñ ban ithuh ba kim dei shuh ki kam be-aiñ ban kumjuh kiwei ki kam be-aiñ kiba la jyllei” bad bynrap, “ka jingmih ki ktem khalai ka dei ka jingbym ler ka sorkar hynrei lada ka tip ba ki don kumta balei kam khang bad pynshitom kat kum ki kyndon ka The Meghalaya Prevention of Gambling Act, 1970”.
U la ong ruh ba ka jingkam u Bah Prestone ba lada pyndam ïa kane ka aiñ khalai ki kam thoh tim bad khalai nusib yn ym don aiñ shuh ban tehlakam ka dei tang ka jingkren laplah namar ha ka jingshisha ïa kine ki jait khalai ki la don da kiwei pat ki aiñ kiba kyrpang kiba kane hi ka sorkar ka la wanrah.
Shuh shuh na ka liang jong u u la kynthoh tyngeh ïa ka jingong u Myntri ka tnat Revenue ba kane ka khalai Casino kan wanrah ïa kita ki nongwan jngohkai pyrthei kiba kham don dor ne High Worth ka dei ka jingkren ba pynpoh dor shibun ïa kiwei pat ki ba wan jngoh ïa ka jingitynnad ka jylla ym da ka jingthmu khalai.
“Lada ïa kita kiba wan na shabar ban khalai ka sorkar ka ong ba ki dei kiba don dor kaba khraw hato kamut ba lada don u khynnah uba tuh na bynta ban ïoh leit khalai ka sorkar kan ong ba u dei uba don dor ne lada don u samla pule uba pheil ha ka jingpule namar u lapmiet ban khalai hato ka sorkar kan ong ba u samla pule ba don dor, nakata ka daw ka dei ïa u Myntri ba u dei ban panmap ne withdraw noh ïa kane ka jingkren jong u” u la ong
U la ong ruh ba lada ka sorkar ka don ka jingthmu ban tehlakam ïa kita ki kam khalai kumba ki kam ki dei ban wanrah ïa kajuh ka aiñ kaba ka jylla Tamilnadu ka leh ha kaba ka la khang lut ïa baroh ki kam khalai la ki dei online gambling bad online batting hadien ba ki la pynlong ka jingtih bniah ïa ka jingktah jong ka kam khalai baroh. Shuh shuh u la ïathuh ba kat kum ka jingwad jingtip kaba la ïoh lyngba ka RTI la lap ba na ka liang ka sorkar kam pat shym la pynlong satia ïa kino kino ki jingtihbnïa na ki samla pule, ki kmie ki kpa bad ki nonghikai la kane ka kam khalai ka don jingktah ne em.