Dawa weng ki nongtrei ïa u Manager ka Toll Plaza ha Pahammawleiñ

Nongpoh, Jylliew 02: Ki nongtrei ka khyrdop khrong khajna (toll plaza) kaba don ha Pahammawleiñ Ri-Bhoi, naduh ki kynthei bad shynrang mynta ka miet ki mih ban sangeh treikam shipor ba kim lah shuh ban shah halor ka jingleh donbor jong u Manager ka Toll Plaza bala tip kyrteng kum u Gagiur Rahman kaba don ha Pahammawleiñ, bad dawa ruh ban weng noh syndon mardor ia u manager kaba la wanrah ka jingdkoh treikam katei ka toll plaza bad ka jingthud ïaki nongtrei naduh bala wan shimti ma u ïaka kam.
Haba kren sha ki lad pathai khubor ki nongtrei katei ka toll plaza kila pynpaw ba kum ki nongtrei kim lah shuh ban shah halor katei ka jingleh donbor u manager katei ka toll plaza u ba la shu kynnoh tuh ïala ki nongtrei, bad ym ju ai shuti lada ki nongtrei ki pan shuti, bad beh ruh ïaki lada ki slem tang dang ki minit ka por trei, bad teng teng kiba don khyllung bad kiba hajan katei ka toll plaza ki ju mih na jaka trei tang ban leit mih shiphang sha iing, hynrei naka liang utei u manager khlem ka jingsngew u la rai beit ïaki ba ki pep baroh shisngi ba kum ki nongtrei kim lah ban pdiang ïa ka jingleh donbor jong utei u manager.
“Ngi dap da ka jingsngew rem teng teng tang namar ba ngi slem tang shi minit 2 minit, u tei u manager u beh noh ïaki ba kim donkam ban wan trei bad ba ki dei ban leit phai noh shala iing, bad shah ot tulop ruh namar bala kheiñ beit ba ki pep trei nalor ka jingkynnoh tuh ruh ïaki nongtrei ba ki tuh pisa na ki jaka trei jong ki, bad bunsien naka liang jong ki kila ujor ruh halor katei ka bynta hynrei ym don ba patiaw satia” la ong iwei naki nongtrei bym kwah pynpaw kyrteng da kaba bynrap ruh baka CCTV camera ka don 24 kynta ha katei ka jaka trei jong ki balei kim peit bad shu kynnoh khlem nongrim bad khlem ka jingshisha.
Kila kynnoh ruh baka jaka bam jaka dih ha katei ka jaka ka long kaba jaboh bad kim ioh wat tang ka um ban dih bad lada ki leit ban thied nabar kila shah kylli jingkylli pynban nangno ki ioh pisa kaba kum ki nongtrei kila ju ujor bunsien hynrei kam poi shaei shaei ruh, naka liang kitei ki nongtrei kynthei kila kynnoh ruh ba utei u manager u ju kren ruh wat ïaki kam iing kam sem ki bym don jingïadei eiei bad katei ka kam kaba ki trei nalor ba dei u bar jylla ba ki shah kheiñ poh haka jaka lajong.
Halor katei ka bynta naka liang kitei ki nongtrei kila dawa ruh ba dei ban weng noh mardor ïa utei u manager bad lada kim lah naka liang kitei ki nongtrei kin sa shim pat da kiwei ki sienjam.
Naka liang u Bah Jayand Sylliang Local Director u la pynpaw ba kum kine ki jingjia kim pat ju jia koit naduh ba la sdang ïa katei ka toll plaza ha u snem 2015 hynrei katei ka kompani kala ioh ban lehbor dei naka jingai mon jong u Rangbah Shnong ba ma u wat la thung kum u local director um ju don jingtip shuh halor katei ka toll plaza bad la shu pyntip tang haka por ba don ka huri hura.
Halor katei ka bynta naka liang ki pulit ka Ri Bhoi ruh kila hiar sha katei ka jaka naka bynta ban tem ïaka huri hura kaba lah ban mih na katei ka jingpyrshah jong kitei ki nongtrei ïa u Manager katei ka Toll Plaza ba kim lah shuh ban shah halor ka rukom treikam jong u ha katei ka jaka.
Kum ban shu pynpaw ba katei ka toll plaza mynta la pyniaid da ka MB Consortium Company ban lum khajna naki kali kiba iaid lyngba ka surok National Highway ha Ri-Bhoi.