Shillong, Nailur 29 : Uwei na ki nongtrei mon sngewbha uba na ri lum Garo (Social activist) u Greneth M Sangma u la kyntu ïa u Superintendent of Police ka South Garo Hills ban wanrah biang ïa ka Anti Dacoity camp hapoh ka thaiñ Mindikgre.
Na ka liang u Sangma u la ong ba ïa kane ka AD camp la hap ban khang khyrdep noh na daw kawei ka jingjia bthei bom ba dangshen kaba la jia hapoh ka shnong Siju.
U la pynkynmaw ruh ïa ka jingtyrwa kaba ha ka 15 tarik u bnai Jylliew, 2021 ba la wanrah da u Assistant Inspector General of Police (A) ban buh noh ïa ka police station ha Mindikgre, kaba dei ka jingdawa kaba la neh slem da ki nongshong shnong naduh ka snem 2018. U Sangma u la ong ba da ka jingbuh ne wanrah biang ïa ka police station ne outpost kan long ka sienjam sha katei ka lynti.
Na ka liang u Sangma u la kyntu ïa u SP ban shim ïa ki sienjam kiba kongsan bad kiba donkam ban wanrah biang ïa ka AD Camp hapoh ka shnong Mindikgre tat haduh ban da la ïoh ïa ka police station kaba neh shyrta.
